Lêpirsîna Rojin Kabaîşê: Raporeke nû, dema Kabaîş winda bû hesabê wê yê Google'ê hatiye vekirin
Di lêpirsîna mirina Rojin Kabaîşê de raporeke nû ket dosyayê. Li gorî raporê, çar roj piştî windabûna Kabaîşê, hesabê wê yê Google'ê yê girêdayî têlefonê hatiye vekirin. Di 10'ê Cotmehê de jî li ser cîhazê 'jêbirin' hatiye kirin.
RastinewsDi lêpirsîna mirina Rojin Kabaîşê de raporeke pisporan a nû ket dosyayê. Li gorî vê raporê, çar roj piştî windabûna Kabaîşê, ketina hesabê wê yê Google'ê yê girêdayî têlefonê hatiye kirin. Di 10'ê Cotmehê de jî li ser cîhazê pêvajoya «jêbirinê» hatiye kirin.
Di lêpirsînê de her wiha li benda raporeke Tibba Edlî ye. Ev rapor dê diyar bike ka du dermanên di laşê Kabaîşê de hatine dîtin kengî hatine bikaranîn û gelo ew di avê de xeniqiye an na.
Rojin Kabaîş xwendekareke zanîngehê bû. Ew di 27'ê Îlonê 2024'an de li Wanê winda bû. Piştî 18 rojan cesedê wê hat dîtin. Têlefona wê ya destan û hesabên girêdayî wê demeke dirêj vekirî nedibûn. Niha raporeke nû ya pisporan ket dosyaya lêpirsînê.
Li gorî vê raporê, di 1'ê Cotmehê 2024'an de, çar roj piştî windabûna Kabaîşê, bi rêya peyameke SMS'ê ketina hesabê wê yê Google'ê hatiye kirin. Ev peyam li ser navnîşaneke IP'ê hatiye şandin.
Li gorî tomareke din a di raporê de, di 10'ê Cotmehê 2024'an de, dema Kabaîş hê jî winda bû, li ser hesabê wê yê Google'ê pêvajoya «jêbirina cîhazê» hatiye kirin. Hatiye diyarkirin ku ev navnîşana IP'ê bi Wanê ve girêdayî ye. Di heman rojê de, bi navnîşaneke din a IP'ê ya li Çekyayê xuya dike jî, ketin û piştrastkirina nasnameyê hatiye kirin. Piştî wê, di pergalê de tomara «Serkeftî - Pêvajoya jêbirina cîhazê» çêbûye.
Di raporê de hatiye texmînkirin ku navnîşana IP'ê ya li Çekyayê xuya dike, dibe ku bi VPN'ê hatibe guhertin. Herwiha hatiye diyarkirin ku ev pêvajo di wê demê de çêbûne, dema têlefon li Laboratûara Krîmînal a Cendirmeriya Wanê bû.
Li Îspanya û Çînê jî têlefon venebû
Têlefona Kabaîşê yek ji delîlên girîng ên lêpirsînê ye. Ji bo gihîştina daneyan, di reşemiyê de ew têlefon şandibûn Îspanyayê. Lê belê qufila cîhazê venebû. Paşê di 30'ê Nîsanê de têlefon şandin Çînê, ji bo lêkolîneke teknîkî. Li wir jî raporek hat amadekirin. Li gorî vê raporê jî negihîştine daneyên cîhazê.
Di lêkolîna li Çînê de her wiha hişyarî hatiye dayîn: hin destwerdanên li ser têlefonê dibe ku bibin sedema jêbirina bêtemamî ya nermalav û daneyên cîhazê.
Li benda raporeke nû ya Tibba Edlî ne
Di aliyekî din ê lêpirsînê de jî, lêkolînên nû yên Tibba Edlî li ser sedema mirina Kabaîşê didomin.
Li gorî nûçeya Mistefa Şekeroglu ya di Habertürk'ê de, li benda raporeke nû ne ku dê zelal bike gelo du dermanên cuda yên di laş û organên hundirîn ên Kabaîşê de hatine dîtin kengî hatine bikaranîn. Di lêkolîna cesedê de, di zik û organên hundirîn ên Kabaîşê de maddeya Rocuronium, di naveroka zikê de jî maddeya Ornidazole hatibû dîtin.
Parêzerê malbatê Evdirehman Karabulut got, Rocuronium dermanekî bihêz e ku masûlkeyên bêhnvedanê tesîr dike. Wî got ev madde nikare ji emeliyata ku Kabaîş hefteyan berê derbas kiribû, mabe. Wî texmîn kir ku dibe ku ciwana bimirin xewê xistibin û bêhnvedana wê felc kiribin.
Li gorî daxwaza malbatê, lêkolîneke diyatoman jî hatiye kirin. Encama vê lêkolînê jî dê di raporê de cih bigire. Testa diyatoman dibe alîkar ku diyar bike gelo Kabaîş di avê de xeniqiye an na.
Bavê Rojin Kabaîşê, Nîzamettîn Kabaîş, got heke ji nimûneyên li Saziya Tibba Edlî encam neyên girtin, wê demê dibe ku pêvajoya Fekk-i Kabir bikeve rojevê.
Çavkanî: T24