Şeş şert ji bo Hurmuzê: Îran ji Amerîkayê dixwaze biçe û tezmînat bide
Îranê ji bo vekirina Behra Hurmuzê şeş şert danî ser masê. Di nav xwestekên Tehranê de sekinandina operasyonên leşkerî yên Amerîkayê, rakirina embargoyan û vegera hêzên Amerîkî ji sînorên Îranê jî heye.
RastinewsÎranê ji bo ku Behra Hurmuzê dîsa vebe şeş şert danî ser masê. Xwestekên Tehranê ev in: Amerîka operasyonên xwe yên leşkerî bisekine, embargoyên li ser Îranê rabin, sermiyanê Îranê yê qedexekirî were berdan, zerarên şer werin dayîn û hêzên Amerîkayê ji derdora sînorên Îranê vekişin.
Sekreterê Giştî yê Encumena Bilind a Ewlekariya Netewî ya Îranê Mihemed Bakir Zulqedir ragihand ku biryara dawî ya derheqê vekirina Behra Hurmuzê de, ku giringiyeke stratejîk heye, girêdayî pêkanîna Rêkeftina Îslamabadê ye.
Şertên ku Zulqedir eşkere kirin ev in:
- Amerîka bila operasyonên xwe yên leşkerî li dijî Îranê û hevalbendên wê yên herêmê bi tevahî bisekine,
- Embargoyên aborî yên li ser Îranê bila werin rakirin,
- Sermiyanê Îranê yê qedexekirî bila were berdan,
- Zerarên ku Îran di dema şer de kişandiye bila werin dayîn,
- Amerîka bila hêzên xwe yên leşkerî yên derdora sînorên Îranê vekişîne,
- Washington bila li gorî hukmên Rêkeftina Îslamabadê tevbigere.
Tehranê ragihand ku danûstandinên di navbera Îran û Ûmanê de ne li ser statuya siyasî ya Hurmuzê ne. Wê got ev danûstandin tenê alîyên teknîkî, hiqûqî û îdarî yên rêyên veguhastina deryayî digrin nav xwe.
Washington: Em ê hemû amûran bi kar bînin
Cîgirê Serokê Amerîkayê J.D. Vance got ku Washington ê ji bo gihîştina armanca xwe amûrên dîplomatîk, aborî û leşkerî bi kar bîne.
Li gorî nêrîna rêveberiya Amerîkayê, domandina zextê li ser Tehranê dikare Îranê bal bikişîne aliyekî lihevkirinê. Ev lihevkirin dikare rê li ber vegera hinardekirina enerjiyê veke.
Di têkiliyên bi navbeynkariya Ûmanê ve tên domandin de pêşketin hebûn. Ev pêşketin îhtîmala rakirina sînorkirinên li bendergehên Îranê xurt kir. Wiha jî îhtîmala vegera hinardekirina neftê, piştî valahiyeke nêzî pênc mehan, xurttir bû.