جارێک لە گرێ سپییەوە، جارێکیش لە ڕەقەوە: ئێستاش ترسی دەرکردن لە قوتابخانە بۆ خێزانە کوردەکان
نزیکەی ٣٠ خێزانی خەڵکی ڕەقە و گرێ سپی کە پەنایان بردووەتە قوتابخانەیەک لە کۆبانێ، لەگەڵ نزیکبوونەوەی ساڵی خوێندنی نوێ نیگەرانی ئاوارەبوونەوەیەکی دیکەن. لەنێویاندا ساڵانێک
Rastinewsنزیکەی ٣٠ خێزانی خەڵکی ڕەقە و گرێ سپی، کە پەنایان بردووەتە قوتابخانەیەک لە کۆبانێ، لەگەڵ نزیکبوونەوەی ساڵی خوێندنی نوێ نیگەرانی ئاوارەبوونەوەیەکی دیکەن. ئاوارانێک کە لەنێویاندا خێزانی کورد هەن کە بۆ جاری دووەم لە ماوەی چەند ساڵدا ناچار بوون کۆچ بکەن، دەڵێن: «هیچ شوێنێکی دیکەمان نییە بۆ چوون.»
قوتابخانەی شەهید ئازاد لە کۆبانێ، بەم چەند مانگە پێشوازی لە خێزانەکانی کۆچبەری ڕەقە و گرێ سپی دەکات. بەڵام ساڵی خوێندنی نوێ کە ئەم مانگە دەست پێدەکات، نادیاریەکی نوێی بۆ نزیکەی ٣٠ خێزانی نیشتەجێ لە پۆلەکانی قوتابخانەکە هێناوە.
ئاسیای خەڵکی گرێ سپی یەکێکە لە هەزاران کوردی دیکە کە دوای هێرشەکانی ٩ی تشرینی یەکەمی ٢٠١٩ ناچار بوو ئەو خاکەی تێیدا لەدایکبووە و گەورە بووە بەجێبهێڵێت.
ئاسیا دوای جێهێشتنی گرێ سپی نزیکەی ٧ ساڵ لە ڕەقە ژیا، بەڵام لە ١٧ی کانونی دووەمی ٢٠٢٦ ئەم جارە ناچار بوو لە ڕەقە کۆچ بکات. ئاسیا لە ناوەڕاستی زستاندا لەگەڵ منداڵەکانی گەیشتە کۆبانێ و پەنای بردە قوتابخانەی شەهید ئازاد.
ئێستاش لەگەڵ کردنەوەی قوتابخانەکان دەترسێت جارێکی دیکە ئاوارە بکرێتەوە.
ئاسیا وتی: «ئەگەر پێویست بکات خۆمان دەسووتێنین، بەڵام لە قوتابخانە دەرناچین. منداڵەکانمان بۆ کوێ ببەین؟ کاتێک یەکەم جار هاتین، بەفر لەسەر زەوی بوو. منداڵەکانم بۆ ماوەی پێنج ڕۆژ لەسەر چادرێک نوستن. نە پاتانیمان هەبوو و نە دۆشەکیشمان.»
باری خێزانەکانی دیکەی قوتابخانەکەش جیاواز نییە. عەفرا موحەممەدی خەڵکی ڕەقە ڕایگەیاند کە شەش ساڵ لەمەوبەر کوڕەکەی لەدەستداوە و لەگەڵ کوڕێک و کچێکدا هیچ شوێنێکیان نییە بچنە سەری.
ئەڤاش عەلی، خەڵکی مەنبیج، ئەوەی بەسەریدا هاتووە بەم وشانە باسکرد: «زۆر زوڵم و برسیێتی و ترسمان بینی. ئیتر بەسە. با شوێنێکمان بۆ دابین بکەن سەرمانی تێدا شار بدەینەوە. تەنها داوای پەناگایەک دەکەین.»
ئەحمەد خوجە، هاوسەرۆکی ئەنجومەنی کاروباری کۆمەڵایەتی، ڕایگەیاند کە لەگەڵ دەستپێکردنی ساڵی خوێندن دەبێت خوێندکاران بگەڕێنەوە بۆ پۆلەکانیان، لەبەر ئەوە پێویستە شوێنی نیشتەجێبوونی بەدیل بۆ ئەو خێزانانەی لە قوتابخانەکە ماونەتەوە دابین بکرێت. خوجە هەروەها ڕایگەیاند کە هەتا ئێستا هیچ ئاگاداریەک نەدراوەتە خێزانەکان بۆ بەجێهێشتنی قوتابخانەکە.
بەپێی داتاکان، ئەمڕۆ لە ناوەند و گوندەکانی کۆبانێ ٦ هەزار و ٥٠ خێزانی ئاوارە ژیان بەسەردەبەن. ٣ هەزاریان تۆماری دانیشتووانی ڕەقەن و ٣ هەزار و ٥٠یشیان تۆماری دانیشتووانی گرێ سپین.
بۆ زۆربەی خێزانەکان داواکاری سەرەکی گەڕانەوەیە بۆ ماڵەکانیان، نەک دۆزینەوەی شوێنی کۆچی نوێ. بەڵام لەبەر ماڵە وێرانبووەکان لە کاتی جەنگدا و نادیاری لە ناوچەکانیان، گەڕانەوە هێشتا وا دیارە شتێکی ئەستەمە.
سەرچاوە: ڕووداو