پرۆسەی «تورکیای بێ تیرۆر» گەیشتە زانکۆکان: یۆک داوای پشتگیری ئەکادیمی کرد

Rastinews — یۆک زانکۆکانی خستووەتە ناو پرۆسەی «تورکیای بێ تیرۆر»یەوە.

بەپێی هەواڵی ماڵپەڕی ئەڤرەنسێل، لە نامەیەکدا کە بە واژووی ئێرۆل ئۆزڤار، سەرۆکی یۆک، بۆ هەموو زانکۆکان نێردراوە، داواکراوە بە خەبات و توێژینەوەی ئەکادیمی یارمەتی ئەم پرۆسەیە بدرێت.

لە زانکۆکان داواکراوە لایەنی سیاسی، یاسایی، ئابووری، کۆمەڵایەتی، کولتووری و ئاسایشی پرۆسەکە بکۆڵنەوە و پانێل، کۆنفرانس و کارگەی کار ڕێکبخەن. هەروەها داواکراوە ئەنجامی توێژینەوەکان لەگەڵ کۆمەڵگا هاوبەش بکرێن.

ئۆزڤار وتوویەتی زانکۆکان نابێت تەنها پشتیوانی لە پرۆسەکە بکەن، بەڵکو دەبێت «بە زانیاری، زانست و توێژینەوە» یارمەتی بنیاتنانی ئارامی کۆمەڵایەتی بەردەوام بدەن.

بە ناردنی ئەم نامەیەی یۆک، ئەو پرۆسەیەی ئەنقەرە بەڕێوەی دەبات، بە فەرمی کەوتووەتە ناو بەرنامەی ئەکادیمی زانکۆکانیشەوە.

سەرچاوە: ئەڤرەنسێل