له ئەڵمانیا بڕیاری تاوانی کوشتنی نەورۆز جێگیر بوو: تاوانبار بۆ کوشتنی پسمامی تاهەتایی زیندانی کرا

Rastinews — له شاری پارسبێرگی ئەڵمانیا بڕیاری زیندانی تاهەتایی بۆ ئەو تاوانبارەی که له ئاهەنگی نەورۆزی ساڵی 2025دا پسمامی خۆی بە چەقۆ کوشتبوو، جێگیر بوو. دادگا بڕیاریدا ئەم کوشتنە بە هۆکاری "تۆڵەسەندنەوە" و "پاراستنی شەرەفی خێزان"ەوە ئەنجام دراوە، دوای ململانێیەکی که دەگەڕێتەوە بۆ 20 ساڵ لەمەوبەر.

پرۆسەی دادوەری سەبارەت بەو تاوانەی له 23ی ئازاری 2025 له ئاهەنگی نەورۆز له شاری پارسبێرگی وڵاتی باڤاریای ئەڵمانیا ڕوویدا، کۆتایی پێهات.

دادگای ئایالەتی نورنبێرگ-فورت له 12ی شوباتی 2026 تاوانبارەکەی که پسمامی خۆی کوشتبوو، بە زیندانی تاهەتایی حوکم دا. دواتر سکاڵای تاوانبارەکە دژی ئەو بڕیارە لەلایەن دادگای بااڵی فیدراڵییەوە ڕەت کرایەوە. بەم شێوەیە بڕیاری زیندانی تاهەتایی جێگیر بوو.

له ناو خەڵکی نەورۆزدا هێرشی کردە سەر پسمامی

بەپێی تۆمارەکانی دادگا، ڕووداوەکە له ئاهەنگێکی نەورۆز که نزیکەی هەزار کەس بەشداریان تێدا کردبوو، ڕوویدا.

تاوانبارەکە پسمامی 39 ساڵەی خۆی له ناو خەڵکەکەدا بینی و لە پشتەوە هێرشی کردە سەری بە چەقۆ. پیاوەکە له دڵدا بریندارێکی قورس بوو و لە شوێنی ڕووداوەکەدا گیانی لەدەستدا.

دەرکەوت که مێژووی ئەم کوشتنە دەگەڕێتەوە بۆ نزیکەی 20 ساڵ لەمەوبەر و بۆ خاکی سووریا.

خوشکی تاوانبارەکە هاوسەری کەسی کوژراو بووە و له ساڵی 2005دا له سووریا گیانی لەدەستدابوو. تاوانبارەکە پسمامی خۆی بەرپرسیار له مردنی خوشکەکەی دەزانی.

دادگا بڕیاریدا که تاوانبارەکە ساڵانێک دواتر پسمامی خۆی کوشتووە بۆ تۆڵەسەندنەوەی مردنی خوشکەکەی و بۆ "دووبارە دامەزراندنەوەی شەرەفی خێزان" بەپێی بۆچوونی خۆی.

دادگا: بە هۆکاری پیس ئەنجام دراوە

دادگای ئایالەتی نورنبێرگ-فورت هێرشەکەی خستە چوارچێوەی کوشتنێک که بە سوودوەرگرتن له بێدەرفەتی قوربانی و بە "هۆکاری پیس"ەوە ئەنجام دراوە.

دادگا هەروەها بڕیاریدا که تاوانی تاوانبارەکە "گرانیی تایبەت" هەیە. ئەم بڕیارە ڕێگرییش دەکات لەبەردەم ئەگەری ئازادکردنی مەرجیی که له ئەڵمانیا بۆ زیندانییە تاهەتاییەکان دوای 15 ساڵ دەکرێت بخرێتە بەردەم.

لقی شەشەمی تاوانی دادگای بااڵی فیدراڵی، دوای پێداچوونەوە بە پەڕگەکە، بڕیاریدا که هیچ هەڵەیەکی یاسایی دژی تاوانبارەکە له بڕیاری دادگای ناوچەیی نەبووە و داواکاری تەمییزی ڕەتکردەوە.

ئاماژە بەوە کرا که تاوانبار و قوربانی خەڵکی ڕۆژئاوان

بەپێی زانیارییەک که ڕووداو لە دادگاوە بەدەستی هێناوە، تاوانبار و پسمامە کوژراوەکەی له ڕۆژئاوا لەدایک بوون.

یەکێک لە ڕێکخەرانی ئاهەنگی نەورۆزی ساڵی 2025 له پارسبێرگیش بە ڕووداو گوت، بەپێی زانیارییەکانی ناوچەکە، هەردوو پسماما خەڵکی شاری کۆبانیی ڕۆژئاوان.

ڕێکخەرەکە که نەیویست ناوی ئاشکرا بکرێت، ئاماژەشی بەوە کرد که دوای ئەم کوشتنە شارەوانی پارسبێرگ به هۆکاری ئاسایشەوە ڕێگای بە ئاهەنگی نەورۆز له شارەکە له ساڵی 2026دا نەداوە.

بەاڵم له تۆمارە گشتییەکانی شارەوانیدا ڕاستەوخۆ ڕوونکردنەوەیەک سەبارەت بەم زانیارییە نییە. لەبەر ئەوە پەیوەندی نێوان نەدانی مۆڵەت بۆ نەورۆز و کوشتنەکە، لە قۆناغی ئێستادا تەنها پشت بە قسەی ڕێکخەرەکە دەبەستێت.