لە سلێمانی نۆشتەیەکی سەرنجڕاکێش لە بواری پزیشکیدا: لە ناوچەوان لووت دروستکرا
Rastinewsلە شاری سلێمانی، بۆ کرێکارێک کە لە ئەنجامی ڕووداوێکی کار لووتی لەدەستدابوو، پزیشکەکان بە بەکارهێنانی خرۆکی پەراسووی خۆی نەخۆشەکە، لووتێکی نوێیان لە ناوچەوانیدا دروستکرد.
ئەم پرۆسەیە بە سەرپەرشتی د. دیار عەبدولوەحید، پسپۆڕی نەشتەرگەری پلاستیک و بنیاتنانەوە، و تیمەکەی نزیکەی ساڵێک لەمەوبەر دەستیپێکردووە. لە قۆناغی یەکەمی نەشتەرگەریدا، لە پەراسووی نەخۆشەکە پارچەیەک خرۆک وەرگیراوە و پێکهاتەی لووت پێکهێنراوە، پاشان لە ناوچەوانی نەخۆشەکە داچەسپێنراوە، چونکە ئەوێ گونجاوترین ناوچەیە لە ڕووی گونجانی شانە و خوێنبەدی.
د. عەبدولوەحید ڕایگەیاند کە هۆکاری هەڵبژاردنی ناوچەوان، گونجانی ڕەنگ و شانەی پێستی ڕوو لەگەڵ لووتی نوێ و هەروەها خوێنبەدییە بەهێزەکەیەتی، هەروەها ئاماژەی بەوەشدا کە ئەم نەشتەرگەریە بەهۆی ئاڵۆزی شێوازەکەوە، وەک تاقیکردنەوەیەکی کلینیکی و بەخۆڕایی ئەنجامدراوە.
د. عەبدولوەحید ڕایگەیاند کە پێکهاتەی لووتەکە تەواو بووە و ئامادەیە بۆ گواستنەوە بۆ شوێنی ڕەسەنی خۆی، و بۆ هەنگاوی کۆتایی چاوەڕێی بڕیاری نەخۆشەکەن.
نموونەیەکی هاوشێوەی نەشتەرگەری بنیاتنانەوە ساڵی 2013 لە چین، لەسەر گەنجێکی 22 ساڵان کە لە ڕووداوی هاتووچۆدا لووتی لەدەستدابوو، بە سەرکەوتوویی ئەنجامدرابوو.
سەرچاوە: ڕووداو