Enqere 6 yekîneyên zankoyê, ya Efrînê jî tê de, radestî Şamê dike
Tirkiye 4 fakulte û 2 xwendegehên bilind ên pîşeyî yên li Efrîn, Cerablus, Elbab, Azez û Çobanbeyê girt. Ev biryar, rê li ber radestkirina wan yekîneyan bi pergala xwendina bilind a rêveberiya Şamê ve vedike.

RastinewsBiryar bi îmzeya Serokomarê Tirkiyeyê Recep Tayyip Erdogan hat dayîn. Îro di Rojnameya Fermî de hat weşandin. Li gorî biryarê, 4 fakulte û 2 xwendegehên bilind ên pîşeyî yên zankoyên Tirk li bakurê Sûriyeyê hatin girtin.
Ji wan yekîneyan çar li binê Zankoya Gaziantep bûn: Xwendegeha Bilind a Pîşeyî ya Cerablus, Fakulteya Zanistên Aborî û Îdarî ya Elbab, Fakulteya Zanistên Îslamî ya Azez û Fakulteya Perwerdehiyê ya Efrînê. Bi heman biryarê, Fakulteya Bijîşkiyê ya Çobanbeyê û Xwendegeha Bilind a Pîşeyî ya Karûbarên Tenduristiyê ya Çobanbeyê jî hatin girtin. Ev her du yekîne li binê Zankoya Zanistên Tenduristiyê bûn.
Yekîne radestî Şamê dibin
Biryar li ser peymanekê hatiye avakirin. Ev peyman di navbera Enqere û rêveberiya Şamê de hatiye îmzekirin. Li gorî peymanê, fakulte û xwendegehên zankoyên Tirk ên li bakurê Sûriyeyê, dê bikevin binê pergala xwendina bilind a Sûriyeyê. Di biryarê de her wiha rêzikek heye; ev rêzik destnîşan dike ka xwendekar dê xwendina xwe çawa bidomînin.
Zankoya Gaziantep di Nîsana 2018an de yekîneya xwe ya pêşî li Sûriyeyê vekiribû. Ev yekîne li Cerablus, wekî xwendegehek bilind a pîşeyî, hat vekirin.
Efrîn di Adara 2018an de ji destê rêveberiya Rojava hat stendin. Ev bi operasyoneke leşkerî ya artêşa Tirk û komên çekdar ên Sûrî çêbû. Piraniya niştecihên Kurd ên bajêr, piştî operasyonê neçar man ji herêmê koç bikin.
