Rojnameya kurd a Êzidî Düzen Tekkal li Berlînê «Xelata Fêm û Tolerasyonê» stend
Rojnameya kurd a Êzidî û parêzvana mafên mirovan Düzen Tekkal, «Xelata Fêm û Tolerasyonê» ya Muzexaneya Cihûyan a Berlînê stend. Serokomarê Almanyayê Frank-Walter Steinmeier jî beşdarî merasîma ku li gel salvegera 25an a muzexaneyê pêk hat bû.

RastinewsRojnameger û nivîskara kurd a Êzidî Düzen Tekkal, bû xwediyê «Xelata Fêm û Tolerasyonê» ya ku her sal ji aliyê Muzexaneya Cihûyan a Berlînê ve tê dayîn. Xelat şeva şemiyê li Berlînê bi merasîmek hat dayîn.
Xelata vê salê, Tekkal û xêrxwaz û nivîskarê Îngilîz Sir Michael Moritz bi hev re parve kirin.
Muze, Tekkal wek «yek ji parêzvanên mafên mirovan ê pêşeng» da naskirin. Jurî, şerê Tekkal ê li dijî antîsemîtîzmê, nîjadperestiyê û dujminatiya mirovahiyê, û xebatên wê yên ji bo diyalogê navdînî, derfeta wekhev di perwerdehiyê de, aştî û demokrasiyê, bi taybetî destnîşan kir.
Steinmeier: Bêdeng nemîne, berê xwe neguherîne
Di merasîmê de, bi boneya salvegera 25an a muzexaneyê, Serokomarê Almanyayê Frank-Walter Steinmeier û derhênerê damezrîner ê muzexaneyê W. Michael Blumenthal axivîn.
Steinmeier got ku dengên antîsemît li Almanyayê her ku diçe bilind û hovane dibin. Got ku li kêleka cihûyan sekinandin, wateya «bêdeng nemayîn û berê xwe neguherandin» dide.
Li gorî nûçeya ajansa nûçeyan a Almanî dpa, Muzexaneya Cihûyan a Berlînê vê xelatê her sal dide kesên ku ji bo fêmkirina gelan, yekbûna hindikahiyan bi civakê re, û jiyana li gel hev a dîn û çandên cuda tevkariyê dikin.
Ji Şengalê heta Berlînê
Düzen Tekkal ku li Hannoverê ji dayik bûye, piştî êrîşa IŞÎDê ya li ser Şengalê di sala 2014an de, çû herêmê. Bû yek ji wan rojnamegerên ku qirkirin belge kirin. Tekkal paşê komeleya HAWAR.help damezrand, ku alîkariya jin û keçên Êzidî dike.
