Talabanî li Bexdayê bi lideriyê milîsan re civiya, ku 10 mîlyon dolar xelat li ser serê wî heye
Serokê Yekîtiya Nîştimanî ya Kurdistanê (YNK) Bafil Talabanî û lideriyê Tevgera Nifşê Nû Şaswar Abdulwahid, li Bexdayê bi Ebû Ala el-Velaî re civiyan. El-Velaî serokê Ketaîb Seyîd eş-Şuheda ye. DYE dibêje ew ê 10 mîlyon dolar bide kesê ku agahiyên li ser Velaî bide.
RastinewsSerokê YNK Bafil Talabanî û lideriyê Tevgera Nifşê Nû Şaswar Abdulwahid, di 12ê Mijdarê de li Bexdayê bi Sekreterê Giştî yê Ketaîb Seyîd eş-Şuheda Ebû Ala el-Velaî re civiyan. Berpirsê Buroya Siyasî ya YNK li Bexdayê Xalid Şewanî jî di civînê de amade bû. YNK li ser mijara civînê agahî neda.
Navê rastîn ê Velaî Haşim Finyan Rahîm es-Saracî ye. Wezareta Karên Derve ya DYE di Nîsana 2026an de ragihandibû ku ew ê heta 10 mîlyon dolar bide kesê ku cihê Velaî eşkere bike.
Di lîsteya terorê ya Washingtonê de
Ketaîb Seyîd eş-Şuheda yek ji komên çekdar e, ku Îran li Iraqê piştgirî dide wan. Têkiliyeke nêzîk a vê komê bi Ordîya Pasdarên Şoreşa Îranê (DMO) re heye.
DYE di Mijdara 2023an de ev kom û Velaî xistin lîsteya Teroristên Taybet ên Cîhanî (SDGT). Ketaîb Seyîd eş-Şuheda di Îlona 2025an de jî wek Rêxistina Teror a Biyanî (FTO) hat ragihandin. Washington vê komê bi êrîşên li ser Balyozxaneya DYE ya li Bexdayê, avahiyên balafirgehê û tesîsên petrolê yên pargîdaniyên biyanî ve girêdide.
Li Bexdayê civîn li pey civînan
Velaî ne tenê muxatebê Talabanî û Abdulwahid bû li Bexdayê. Herdu lideran heman roj bi Serokwezîrê berê yê Iraqê Mihemed Şiya es-Sudanî, lideriyê Yekîtiya Dewleta Qanûnê Nûrî el-Malikî û lideriyê Hevpeymaniya Fetihê Hadî el-Amirî re jî bi awayekî cuda civiyan. Roja din jî bi lideriyê Tevgera Hikmeta Nîştimanî Emar el-Hekîm re hevdîtin kirin.
Ev têkilî di dema herî tund a krîza di navbera YNK û Partiya Demokrat a Kurdistanê (PDK) de pêk hatin. Parlamentoya Herêma Kurdistanê di 4ê Mijdarê de, di rûniştineke ku YNK û Nifşê Nû boykot kiribûn de, Desteya Serokatiyê hilbijart.
Talabanî roja din ragihand ku YNK ji hikûmeta herêmê vekişiya. Wî got ew ê tu biryara ku ji wê rûniştinê derketiye napejirînin.
Ji Netanyahu re gotibû «mirovekî şikestî»
Civîn, hema piştî gotinên Talabanî yên li ser Îsraêlê hat. Talabanî ji The National re axivî, bo Serokwezîrê Îsraêl Binyamîn Netanyahu got «mirovekî şikestî». Wî got karê herî baş ê Netanyahu dikare ji bo Îsraêlê bike, dev ji siyasetê berdan e.
/Nerina Azad/