Şaxa Sahêlê ya DAIŞê berpirsiyarî stend: Li Nîjerê di du êrîşan de zêdetirî 50 karmendên ewlehiyê hatin kuştin
Li rojavayê Nîjerê di nav hefteyekê de du êrîş qewimîn. Tê ragihandin ku zêdetirî 50 jandarme û eskeran jiyana xwe ji dest dan. Berpirsiyariya êrîşan şaxa DAIŞê ya devera wê, Wîlayeta Sahêlê, stend.
RastinewsLi Nîjera Afrîkaya Rojava, di du êrîşên li rojavayê welêt de zêdetirî 50 karmendên ewlehiyê hatin kuştin.
Li gorî du çavkaniyên ewlehiyê, çarşema derbas bûyî li nêzî bajarê Abala-Filingué qafileyeke jandarmeyan ket bin pistepiskê. Roja şemiyê jî li Birni N'Konni êrîşeke din pêk hat. Di vê êrîşê de zêdetirî 30 eskeran jiyana xwe ji dest da.
Hejmara mirinê li ser bingeha çavkaniyên ewlehiyê ye ku navê wan nehatiye eşkerekirin. Hê ne diyar e ka hikûmeta Nîjerê ev hejmar piştrast dike an na.
Wîlayeta Sahêlê du daxuyanî belav kirin
Çavkaniyan tenê got êrîş ji aliyê «terorîstan» ve hatine kirin. Wan agahiyên din neda.
Li gorî ragihandina SITE Intelligence Group, şaxa DAIŞê ya Afrîkaya Rojava, Wîlayeta Sahêlê, roja yekşemê bi du daxuyaniyên cuda berpirsiyariya êrîşan stend.
Analîst û çavkaniyên ewlehiyê dibêjin nerihetî di nav hêzên li ber eniyê zêde dibe. Bi taybetî li rojavayê welêt, van hêzan li hember komên cîhadî bi berdewamî windahî dane.
Li gorî nûçeya Reuters, meha borî li Nîjerê eskerên serhildêr êrîşî balafirgehê û avahiya serokatiya komarê kirin. Di vê tundîtiya bi hêzên hikûmetê re, Africa Corps ku di bin kontrola Kremlînê de ye alîkariya hêzên hikûmetê kir.
Di meha hezîranê de jî li Balafirgeha Navneteweyî ya Diori Hamani li paytext Niamey êrîşek pêk hat. Berpirsiyariya vê êrîşê koma bi El-Qaîdeyê ve girêdayî JNIM stend. Di wê êrîşê de 11 eskeran û 2 kesên sivîl jiyana xwe ji dest dabûn.
Li Nîjerê ku birêvebiriya leşkerî li ser desthilatê ye, mîna cîranên wê yên Malî û Burkîna Faso, ji salan ve şer li dijî komên girêdayî El-Qaîde û DAIŞê berdewam dike.