AB ji Iraqê re hişyarî: Kallas vekişîna Amerîkayê bi tehdîda Îranê ve girêda
RastinewsTemsîlkara Bilind a Siyaseta Derve û Ewlekariyê ya Yekîtiya Ewropayê (YE) Kaja Kallas axivî bo Kurdistan24. Wê got vekişîna hêzên Amerîkayê ji Iraqê divê digel tehdîdên Îranê li hember Iraqê bên nirxandin.
Kallas got pêşketinên li Rojhilata Navîn nikarin ji hev cuda bên dîtin. Wê tekez kir divê bûyerên herêmê bi awayekî giştî bên şopandin.
Koalîsyon di 30ê Îlonê de vediqete
Hikûmeta Bexdayê ragihand mîsyona leşkerî ya koalîsyona navneteweyî ya bi serokatiya Amerîkayê li Iraqê dê di 30ê Îlonê de biqede. Vekişîna hêzên biyanî jî dê heta wê tarîxê biqede.
Piştî vekişînê, tê çaverêkirin peywendiyên di navbera Iraqê û welatên koalîsyonê de biçe çarçoveyeke duqilî ya li ser bingeha hevkariya ewlekarî û îstîxbaratê.
Li Herêma Kurdistanê fikara parastina hewayî
Cihê ku vekişîn herî zêde lê tê nîqaşkirin Herêma Kurdistanê ye. Li herêmê tê gotin bi çûyîna koalîsyonê re valahiyeke ewlekariyê dê çêbibe. Fikar heye ku êrişên mûşek û dronên Îranê dê zêde bibin.
Serokwezîrê Herêma Kurdistanê Mesrûr Barzanî roja yekşemê hevpeyivîn da rojnameya Financial Times. Wî got ji 28ê Sibatê heta niha herêm zêdetirî hezar êrişên dron, roket û mûşekan dîtiye. Barzanî diyar kir hiştina herêmê bêyî pergaleke parastina hewayî ya guncan wê herêmê bêparastî bihêle.
Ofîsa Barzanî heman roj ragihand sernav û şîroveya rojnameyê gotinên Barzanî rast nedane der. Ofîsê daxwaza rastkirinê kir.
Îro serê sibê li navçeya Koyeya Hewlêrê, Kampa Azadî ya ku malbatên endamên Partiya Demokrat a Kurdistana Îranê (PDK-Î) lê dimînin, bi sê droneyan hat armanckirin. Desteya Ewlekariya Herêma Kurdistanê ragihand di êrişê de windahiya can çênebûye.