Saral û Şahîn li Navenda Giştî ya MHP'ê li hev hatin
Koma Saral û koma Şahîn bi cîhana binerdê ve têne zanîn. Nêzîkî 22 salan e di navbera wan de neyartî heye. Nûnerên herdu koman li ofîsa Serokê Giştî yê MHP'ê Devlet Bahçelî li hev civiyan û dest dan hev. MHP ev civîn wek «hemêzkirineke dîrokî» ragihand.
RastinewsJi koma Saral Burhanettin Saral û ji koma Şahîn jî rêberê wê yê navdar Sedat Şahin, êvarê li Enqereyê li Navenda Giştî ya MHP'ê bi Bahçelî re civiyan. Piştî civînê wêneyên her sê kesan bi hev re hatin belavkirin.
Ji hesabê fermî yê medyaya civakî yê MHP'ê hat ragihandin: herdu kom wek «du malbatên welatê me yên hêja» hatin binavkirin. Di daxuyaniyê de hat gotin ku li navendê digel Bahçelî «hemêzkirin û civîneke dîrokî» qewimiye.
Civîn Piştî Baskînê Hat
Li gorî nûçeya rojnameya Millî Gazete, ev civîn tavilê piştî baskîneke polîsan qewimî. Baskîn li ser îdiaya ku Yakup Kerem Saral ê ji koma Saral, ji bo suîkasta li Sedat Şahin amade dibû, hat lidarxistin. Li gorî heman nûçeyê, di baskînê de roketavêj û gelek çekên otomatîk hatin desteserkirin.
Berî civîna Enqereyê, malbata Saral li navçeya Sûrmeneyê ya Trabzonê civîneke berfireh li dar xist.
Ne Ewilîn Civîna Bahçelî-Şahîn e
Sedat Şahin piştî ku di sala 2023an de ji girtîgehê hat berdan jî, çû serdana Bahçelî li ofîsa wî ya Navenda Giştî ya MHP'ê. Bi salan e neyartiya di navbera herdu koman de bi lêkolîn û dozên cuda ket rojeva raya giştî.
Ev civîn di serdemeke wisa de qewimî ku pêvajoya «Terörsüz Türkiye», ya ku Bahçelî di payîza 2024an de li ser pirsgirêka kurd dest pê kiribû, hê jî berdewam e. Malpera Serbestiyetê jî ev nûçe bi sernavê «Ji Bahçelî careke din 'pêvajoyeke çareseriyê'» ragihand.