Serokwezîrê Keyaniya Yekbûyî Burnham: Skotlandî xwedan mafê çarenûsiyê ne, lê referandûmek nû tune
Serokwezîrê Keyaniya Yekbûyî Andy Burnham mafê dengdana Skotlandiyan ji bo serxwebûnê qebûl kir. Lê wî referandûmeke duyemîn red kir. Ev daxuyanî piştî daxuyaniya hevpar hat, ku tê de serokên neteweperest ên Skotlandî, Wales û Îrlandî ji Londonê guhertineke destûrî xwestibûn.
RastinewsSerokwezîrê Keyaniya Yekbûyî Andy Burnham got, ji bo serxwebûna Skotlandê referandûmek nû nayê kirin. Wî diyar kir ku ev mesele di referandûma 2014an de bi awayekî qet'î hatiye çareserkirin.
Burnham axaftina xwe li ser televîzyona Skotlandî STV kir. Wî got: «Ev ne dema vegera vê nîqaşê ye. Buhabûn pirsgirêka ku bandorê li piraniya Skotlandiyan dike.»
«Ev mafê wan e, lê...»
Kesekî pirsî: gelo gelê Skotlandê dîsa mafê dengdanê hene? Burnham bersiv da: «Ev mafê wan e. Lê ev ji bo nifşekî nû hatiye diyarkirin.»
Burnham got di nav gelê Skotlandê de li ser referandûmeke nû lihevkirineke zelal tune ye. Wî diyar kir ku dûrxistina rojevê ji mijara buhabûnê dê dabeşker be.
Burnham got: «Ez alîgirê yekbûnê me.» Di hevpeyivînên xwe yên bi BBC û ITV re jî wî îdiaên hilbijartina zû red kirin. Wî got hilbijartin dê di 2029an de bibe.
Muxalefetê tometa «paşvekişînê» kir
Cîgirê Serokê Giştî yê Muhafazakarên Skotlandî Rachael Hamilton, Burnham tometbar kir. Wê got berê wî derî li referandûmeke nû vekiribû, niha jî bi lez paşve dikişe.
Gotinên Burnham di hevpeyivîna wî ya bi edîtorê siyasî yê STV Colin Mackay re derketin holê.
Li Cardiffê daxuyaniya hevpar
Serokê Partiya Neteweyî ya Skotlandê (SNP) û Serokwezîrê Skotlandê John Swinney, bi Serokê Plaid Cymru û Serokwezîrê Wales Rhun ap Iorwerth re, û bi Serokwezîra Îrlandaya Bakur Michelle O'Neill re, di 14ê Îlonê de li Cardiffê protokolek lihevkirinê îmze kiribûn. Wan ji hikûmeta Londonê xwest ku xwe ji bo guhertineke destûrî amade bike û vê yekê hêsan bike.
Di daxuyaniyê de hat diyarkirin ku her netewe mafê xwe heye, çarenûsa xwe bi rêyên demokratîk diyar bike.
Li Skotlandê di 18ê Îlona 2014an de referandûma serxwebûnê hat kirin. Ji sedî 55ê dengdêran deng «na» dabûn.