Wezareta Veguhastinê ya Iraqê: Firîna digel Îranê heta rakirina embargoyan hate rawestandin
Iraqê firîna hewayî ya digel Îranê ya herdualî sekinand. Berpirsiyarekî Wezareta Veguhastinê ya Iraqê got, ev biryar piştî berfirehkirina embargoyên Amerîkayê li ser sektora hewayî ya Îranê hatiye girtin. Wî got, heta ku embargo berdewam bike, rawestandin jî dê dewam bike.
RastinewsBerpirsiyarekî Wezareta Veguhastinê ya Iraqê ragihand, ji îro pê ve hemû firînên herdualî yên navbera Îran û Iraqê hatine rawestandin.
Berpirsiyar got, firînên ji Îranê bo Iraqê û ji Iraqê bo Îranê hatine sekinandin. Piraniya firînên ji Îranê dihatin, li balafirgehên Bexda û Necefê dadan.
Li gorî berpirsiyar, balafirgeha dawî ya ku firînên Îranê lê dihatin kirin Necef bû. Firînên wê balafirgehê jî ji îro pê ve hatin rawestandin.
«Ne tenê di destê Iraqê de ye»
Berpirsiyarê wezaretê got, ev biryar bi tena serê xwe ji aliyê hikûmeta Bexdayê ve nehatiye girtin. Biryar li gorî rêziknameyên navneteweyî hatiye cîbicîkirin.
Berpirsiyar got: «Em girêdayî talîmatan in. Ev ne mijarek e ku tenê di destê Iraqê de ye, biryarek navneteweyî ye. Heta ku embargo neyên rakirin, rawestandin dê berdewam bike».
Ev daxuyanî ji aliyê berpirsiyarê wezaretê ve, di axaftina wî ya bi Rûdawê re hate kirin.
Şirketên welatên sêyem jî di armancê de ne
Wezareta Xezîneyê ya Amerîkayê, di 8'ê Îlonê de ragihand, 27 şirketên firîna hewayî yên ku li sektora hewayî ya Îranê çalak in, xistine lîsteya embargoyan.
Washingtonê got, bi vê biryarê re ku hemû firînên mayî yên Îranê vedigire, şirketên welatên sêyem ên ku xizmetê bi van şirketan re dikin jî dê rûbirûyî rîska embargoyan bimînin.
Piştî vê biryarê, zext li ser şirketên ku sotemenî, xizmeta erdê û firotina bilêtan bo firînên Îranê peyda dikin zêde bû. Hin şirketên taybet ên xizmeta erdê li Iraqê jî, ji ber tirsa embargoyan, dev ji xizmeta firînên Îranê berdan.