Wezareta Pêşmerge: Piştgiriya darayî ya hevbendiyê qediya, dayîna îro ya dawî ye
RastinewsPiştgiriya darayî ya hevbendiya navneteweyî ji Hêzên Pêşmerge re, di çarçoveya peymaneke çarsalî de dihat dayîn. Ev piştgirî sê roj piştî yekbûna fermî ya Pêşmerge qediya. Wezaret dibêje hêvîdar e ku peymaneke nû û berfirehtir were çêkirin.
Karmendekî Wezareta Pêşmerge ya Herêma Kurdistanê got, piştgiriya darayî ya di çarçoveya peymana bi hevbendiya navneteweyî re hatibû îmzekirin, êdî neşê.
Karmend diyar kir peymana çarsalî di navbera 21ê Îlona 2022an û 21ê Îlona 2026an de derbas bûye. Loma piştgiriya darayî ya hevbendiyê jî li gorî vê hat sekinandin.
Wezaretê duh ragihandibû ku piştgiriya darayî ya hevbendiyê ya mehên Tebax û Îlona 2026an dê îro were belavkirin. Çavkaniyeke wezaretê got ev dayîn, dayîna dawî ye di çarçoveya peymana heyî de.
«Îhtîmala peymaneke berfirehtir heye»
Çavkanî got wezaret naxwaze piştgiriya hevbendiyê bi tevahî were birîn. Ew hêvîdar in ku peymaneke nû were çêkirin.
Wê got: «Ev piştgiriya darayî diqede, lê îhtîmaleke peymaneke nû û bihêztir a nêzîk heye. Em hêvî dikin ku Amerîka, li gel Almanya, Brîtanya, Îtalya û Fransa, piştgirî û alîkariya xwe ji Hêzên Pêşmerge yên Kurdistanê yên yekbûyî re berdewam bikin.»
Axaftinên karmend di nûçeya Rûdawê de cih girtin.
Her sal piştgirî ji sedî 25 hatiye kêmkirin
Wezîrê Pêşmerge Şoreş Îsmaîl, di hevpeyvînekê de got piştgiriya darayî ya hevbendiyê li ser peymaneke çarsalî hatiye damezirandin. Her sal ev alîkarî ji sedî 25 kêm bûye.
Îsmaîl got: «Her sal ji sedî 25 hat kêmkirin. Di sala 2026an de jî beşa dawî ya ji sedî 25 nema.»
Yekbûna Pêşmerge di 21ê Îlonê de qediyabû
Yek ji armancên bingehîn ên piştgiriya hevbendiyê ji bo Pêşmerge, anîna Hêzên Pêşmerge yên girêdayî Partiya Demokrat a Kurdistanê (PDK) û Yekîtiya Nîştimanî ya Kurdistanê (YNK) bi hev re bû, di bin banekî yekane de.
Wezareta Pêşmerge di 21ê Îlona 2026an de ragihandibû ku yekbûna hemû Hêzên Pêşmerge bi awayekî fermî qediyaye. Qedandina piştgiriya darayî li hefteya yekem a avahiya yekbûyî rastket.