Biryara Banka Navendî ya Iraqê: Raporên teftîşê dê li Hewlêrê bên amadekirin
Banka Navendî ya Iraqê mecbûrbûna amadekirina raporên teftîşa darayî li Bexdayê ji şîrketên Herêma Kurdistanê rakir. Ev biryar rasterast bandorê li bazirganên ku dixwazin ji bo importê dolarî bi bihayê fermî bikirin dike.
RastinewsBanka Navendî ya Iraqê di 16'ê îlonê de biryareke nû da. Bi vê biryarê, biryara ku bankê di 8'ê mijdara 2024'an de girtibû hat rakirin. Biryara kevn, ji şîrketên Herêma Kurdistanê re mecbûr dikir ku raporên teftîşa darayî li Bexdayê bên amadekirin, ji aliyê Yekîtiya Pîşeyî ya Hesabdarî û Teftîşê ve.
Li gorî biryara nû, heke raporên teftîşê ji aliyê Yekîtiya Pîşeyî ya Hesabdarî û Teftîşê ya Herêma Kurdistanê ve bên amadekirin, Banka Navendî dê wan qebûl bike.
Serokê Odeya Bazirganî û Pîşesaziyê ya Hewlêrê Geylan Hecî Seîd got, ev biryar ji roja Yekşemê, 20'ê îlonê ve ji aliyê bankan ve tê bicihkirin.
Gihîştina dolar bi bihayê fermî dê hêsantir bibe
Ev teftîş beşek e ji prosedurên Banka Navendî. Ev prosedur dihêlin şîrket di karûbarên importê de dolarî bi bihayê fermî bikirin.
Seîd diyar kir ku şîrketên Herêma Kurdistanê heta niha neçar bûne karên teftîşê li Bexdayê bikin. Wî got ev yek ji şîrketan re bareke darayî ya zêde çêdikir.
Li gorî Seîd, rêzikên nû dê ji şîrketan re rê bidin ku karên teftîşê li herêma xwe bikin. Ev yek dê gihîştina bazirganan a dolar bi bihayê fermî jî hêsantir bike.
Yekîtiyên pîşeyî yên Hewlêr û Bexdayê li hev kiribûn
Yekîtiyên Pîşeyî yên Hesabdarî û Teftîşê yên Bexda û Hewlêrê di 16'ê tebaxê de li hev kiribûn. Peyman li ser teftîşa şîrketên di nav sînorên xwe de bû.
Li gorî peymanê, her du dezgeh dê şîrketên di nav sînorê xwe de teftîş bikin. Wê raporên xwe bi nameyeke fermî ji Banka Navendî ya Iraqê re bişînin.
Biryara Banka Navendî ya mijdara 2024'an, karên teftîşê yên şîrketên Herêma Kurdistanê girêdayî Bexdayê kiribû.