Buldan: Di pêvajoya aştiyê de gavên pratîk dest pê dikin
Cîgirê Serokê TBMM'yê Pervîn Buldan, endamê Heyeta Îmralî ya DEM Partî ye. Wê li Wanê bi Diyên Aştiyê re civiya. Piştî civînê wê got, di rojên pêş de dê pêşketinên girîng ên li ser pêvajoyê çêbibin.
RastinewsCîgirê Serokê Meclisa Tirkiyeyê (TBMM) Pervîn Buldan endamê Heyeta Îmralî ya DEM Partî ye. Wê li Wanê bi Diyên Aştiyê re civiya.
Piştî civînê, Buldan li ser hesabê xwe yê medyaya civakî peyamek weşand. Di peyamê de wê bal kişand ser israra wan jinên ku salan e bedelê şer û pevçûnan didin. Wê got ev jin li ser aştiyê israr dikin.
Buldan wiha got: « Jinên ku salan e giraniya herî mezin a êşê hilgirtine, lê dîsa jî ji aştî û jiyanê venegeriyane. Peyva wan ji me re rêber e. Israra Diyên Aştiyê hêviya hevpar a gelan e. Mezinkirina vî dengî û kirina aştiyê ya daîmî, berpirsiyariya me ya hemûyan e. »
«Dê pêşketinên girîng çêbibin»
Buldan, di nirxandina xwe ya piştî civînê de, got pêvajo dê derbasî qonaxeke nû bibe.
« Belkî di rojên pêş de em ê bikevin qonaxek nû. Di vê qonaxê de gavên pratîktir û eşkeretir tên avêtin » Buldan wiha got. Wê destnîşan kir ku bi van pêşketinan re aştî dê bibe tiştekî zelaltir.
Buldan destnîşan kir ku pêvajo tenê bi gavên fermî pêş naçe. Wê got: « Li vir dîsa hewceyî têkoşîna me heye. Hewceyî têkoşîneke hevpar e. Emê vê yekê bi hev re bikin. »
Pêvajo di Cotmeha 2024an de dest pê kiribû
Serokê Giştî yê MHP'ê Dewlet Bahçelî di Cotmeha 2024an de banga xwe ji Abdullah Ocalan re kir. Piştî vê bangê pêvajoyeke nû dest pê kir. Enqere navê vê pêvajoyê kir «Tirkiyeya Bêterorîzmê».
Ocalan di 27ê Sibata 2025an de bi riya Heyeta Îmralî banga «Aştî û Civaka Demokratîk» ji raya giştî re xwend. Di vê bangê de wî ji PKK'ê xwest çekan deyne û xwe fesh bike. PKK di kongreya xwe ya Gulana 2025an de biryara bidawîkirina hebûna xwe ya rêxistinî ragihand.
Di Tîrmeha 2025an de komeke endamên PKK'ê li Silêmanî çekên xwe şewitandin. Ji bo binyata dadrêsî ya pêvajoyê were gengeşekirin, komîsyonek li TBMM'ê hat avakirin.