Ji Raperinê 10 ciwan li Lîbyayê hatin girtin: Ji malbatan 4 hezar dolar fîdye tê xwestin
Rastinews10 ciwanên ji bajarokên Haciawa û Çwarqurna yên girêdayî Rêveberiya Serbixwe ya Raperinê, nêzî 45 rojan berê rê ketin. Armanca wan gihîştina Ewropayê bû. Ew çûne Lîbyayê. Li gorî nûçeya Rûdawê, ciwanên ku temenê wan di navbera 18 û 25 saliyê de ye, li Lîbyayê ji aliyê komeke çekdar ve hatin girtin. Di vîdyoyeke ku li medyaya civakî hatiye belavkirin de, ciwanên bindest li ba kesekî bi erebî diaxive tên dîtin.
Malbatan got kesên ku bi wan re têkilî danîne, ji bo azadkirina her ciwanî 4 hezar dolar xwestine. Endamekî malbatekê got berê jî ji bo gihandina ciwanan bo Ewropayê pere dane. Li gorî agahiyên Rûdawê yên ji çavkaniyên herêmî, kesê ku ciwan girtine, li Lîbyayê bi navê «Ebû Alî» tê naskirin. Tê gotin ku ew ji bo azadkirina wan bi qaçaxçiyên mirovan re dipeyive.
33 ciwanên Kurd berê ji Lîbyayê vegeriyabûn
33 ciwanên Kurd ên ji heman herêmê, berê xwestibûn biçin Ewropayê. Ew nêzî mehekê li Lîbyayê di girtîgehê de mabûn. Di 8'ê Îlonê de ew hatin rizgarkirin û vegerandin Herêma Kurdistanê. Temenê wan ciwanan di navbera 16 û 27 saliyê de bû. Hatibû gotin ku wan ji bo gihîştina Îtalyayê bi qaçaxçiyên mirovan re li ser 19 hezar dolar ji kesî peymanek çêkiribûn.