Dosya doza Kobanê ket lêpirsîna îstînafê
Dadgeha Cezayê ya Giran a Enqereyê ya 22an, di 16'ê Gulana 2024an de li ser Hevserokê Giştî yê berê yê HDPê Selahattin Demirtaş û sanikên din biryara cezayê girtîgehê da. Naha dosyaya vê doza Kobanê ket lêpirsîna Şaxa 22an a Cezayê ya Dadgeha Îstînafê ya Enqereyê.
RastinewsNêzî 10 salan e Selahattin Demirtaş, hevserokê giştî yê berê yê HDPê, li girtîgehê ye. Nîqaşên li ser berdana wî didomin. Di vê navberê de li ser dosya doza Kobanê gavek nû hat avêtin. Demirtaş jî di nav sanikên vê dosyayê de ye. Dosya ji aliyê Dadgeha Îstînafê ya Enqereyê ve ket lêpirsînê.
Dadgeha Cezayê ya Giran a Enqereyê ya 22an vê dosyayê dişopand. Ev doz di nav gel de wek «doza Kobanê» tê zanîn. Di 16'ê Gulana 2024an de vê dadgehê ji Demirtaş û çend sanikên din re cezayên girtîgehê yên cuda da. Piştî ku hikmê xwe yê hûrgilî nivîsî, dadgehê dosya şand Şaxa 22an a Cezayê ya Dadgeha Îstînafê ya Enqereyê. Li gorî agahiyên ji dorberên Enqereyê, dosya niha li vê şaxê ket lêpirsînê. Kengî lêpirsîna îstînafê biqede û dadgeh dê çi biryar bide, hê ne diyar e.
Nîqaşa berdanê dîsa li ser rojevê
Ketina dosyayê nav lêpirsînê, nîqaşên li ser berdana Demirtaş jî dîsa anî rojevê. Mehmet Uçum, Şêwirmendê Sereke yê Serokomariyê û Cîgirê Serokê Encumena Siyaseta Hiqûqê ya Serokomariyê, di 17ê Îlonê de axivî. Uçum got ku li ser rêziknameyeke nû ya îcrayê tê xebitîn. Wî diyar kir ku ev rêzikname efûyeke giştî nîne. Li gorî Uçum, tu asteng tune ye ku Demirtaş serî li vê rêziknameyê bide. Lê belê ev yek bixweber nabe sedema berdana wî. Biryara dawî ya vê yekê a dezgeha dadwerî ye.
Berê serokê MHPê gotibû: «dê xêr be»
Berê Serokê Giştî yê MHPê Devlet Bahçeli got, berdana Demirtaş dê ji bo Tirkiyeyê «xêr» be. Rewşa hiqûqî ya Demirtaş, ê li gorî biryara Şaxa 22an a Cezayê ya Dadgeha Îstînafê ya Enqereyê were diyarkirin.
Demirtaş ji sala 2016an ve girtî ye
Selahattin Demirtaş di şeva 4ê Mijdara 2016an de, di çarçoveya operasyonekê de, hat girtin. Piştre ew hat hepiskirin. Pêvajoya hepiskirin û darizandina Demirtaş demek dirêj e ku dibe mijara nîqaşê. Ev nîqaş li ba dezgehên dadwerî yên Tirkiyeyê û herwiha li ba Dadgeha Mafên Mirovan a Ewropayê (DMME) diqewime. DMME di biryarên xwe yên berê de got, hepiskirina Demirtaş binpêkirina Peymana Ewropî ya Mafên Mirovan e.