Çandarê DEM Partiyê: Naveroka qanûnê tenê Erdogan, Kalîn û Ocalan dizanin
RastinewsPêşnûmeya Qanûna Çarçoveyê ya Pêvajoya Îmralî hatiye amadekirin. Tê texmînkirin ku dê van rojan here Meclîsê. Cengiz Çandarê DEM Partiyê li ser vê qanûnê axivî. Wî got, naveroka qanûnê tenê Erdogan, Îbrahîm Kalîn û Ocalan dizanin.
Çandar bersiv da pirsên Rûdawê. Wî got, ew hêvî dikin qanûn vê hefteyê here Meclîsê. Wî got dê heman hefteyê bibe qanûn.
Li gorî gotina Çandar, piştî ku pêşniyar bibe qanûn, Meclîs dê here betlaneyê:
«Agahiya ku gihîştiye me ev e: tê texmînkirin ku pêşnûma roja duşemê bê radestkirina Serokatiya Meclîsê. Li gorî rêzenameya navxweyî ya Meclîsê, gerek qanûn ji hin qonaxan derbas bibe. Texmîn ew e ku pêşnûma di komîsyonê re derbas bibe. Piştre di 24 saetan de dê biçe Kombûna Giştî. Tê texmînkirin ku roja pêncşemê ya were, ango 6’ê an jî 7’ê vê mehê, dê bibe qanûn. Piştre Meclîs dê here betlaneya havînê.»
Çandar got, pêşnûmeya amadekirî bi partiyên siyasî re nehatiye parvekirin. Wî got, partiya wî jî ji rewşê haydar nîne:
«Heta niha, di nav de DEM Partî jî, tu partî hê naveroka pêşnûmeyê nedîtine. Peyvên wê jî nedîtine. Lê bêguman Serokomar Erdogan ew dîtiye. Dibe ku Serokê MÎTê Îbrahîm Kalîn jî pê dizane. Bêguman Evdulah Ocalan jî ji vê haydar e.»
Çandar got, AKP di vê mijarê de nêzîkatiyek tirsonek nîşan dide. Wî got: «Mebest ev bû ku ev qanûn piştî vebûna Meclîsê were danîn. Lê şopandina Bahçelî û daxwazên opozisyonê, hikûmet neçar hişt.»
Çandar got, bi vê qanûnê re, vegera endamên PKKê dê bi qonax be. Wî wiha domand:
«Ne bi carekê ve, di nav salnameyekê de dê pêk were. Tê zanîn ku navên kesên ku pêwendiya wan bi sûcek rasterast re tune ye, li ba yekîneyên ewlehiyê yên Tirkiyeyê ne. Yek grup gerîla û hin kesên li Ewropayê, piştre kesên di girtîgehan de, dê ji vê salnameya bi qonax sûd wergirin. Gava pêşnûma derket holê, dê bi hejmar diyar bibe kî dê were.»
Çavkanî: Halk Tv