ROJEV3 DEQE XWENDIN
Li Riha civînek ecêb: Kargeha mêraniyê
RastinewsLi gorî nûçeya Ajansa Mezopotamyayê, li Riha kargeha mêraniyê hat lidarxistin.
Li gorî nûçeyê, di civînê de mêrên Rihayê axivîn. Wan got civak û dewlet naxwazin hêza mêr ji destê wî bê stendin. Lê belê guherîn û veguherîn pêwîst e. Divê ev yek ji mêr dest pê bike.
Kitekitên nûçeyê weha ne:
Ji bo newekheviya zayendî ya civakî li Riha xuya bike, kargehek hat lidarxistin. Ev kargeh ji aliyê Tevgera Jinên Azad (TJA) û Partiya Herêmên Demokratîk (DBP) ve hat organîzekirin. Armanca kargehê veguherandina mêran bû. Di kargehê de rol û qalibên mêraniya serdest û çerxa tundiyê bi awayekî rexnegir hatin nirxandin. Beşdaran ezmûnên xwe parve kirin. Xebatên hişyariyê jî hatin kirin. Gelek mêr beşdarî kargehê bûn.
«DIVÊ XEBAT BERBELAV BIBIN»
Enes Milli yê ku beşdarî kargehê bû, got: «Kargehên mêraniyê, mentalîteya mêraniyê ya di hundirê me de derdixin holê. Ev mentalîte tê kêmkirin heta astek herî hindik. Hin caran nîqaşên me yên hundirîn çêdibin. Li ser pirsgirêkên ku di van nîqaşan de derdikevin, çareserî têne dîtin. Bi rastî pirsgirêkên ku em nîqaş dikin li her derê heman pirsgirêk in. Em dikarin bi xwendin û rêxistinbûnê van pirsgirêkan derbas bikin. Li vir li her qada jiyanê xebatên piştgirî bo jiyana hevaltiya azad têne kirin. Ez hêvî dikim ev yek zêdetir belav bibe.»
«AZADÎ BI JINÊ PÊKAN E»
Yeşil Tepe jî yek ji beşdaran e. Wî got: «Divê em nêrîna xwe ya li ser jinan biguherînin. Divê em vê nêrînê li gorî paradîgmaya demokratîk û azadîxwaza jinê saz bikin. Divê em vê yekê bikin beşek ji jiyana xwe. Divê em vê yekê pêşî di nav xwe û malbata xwe de bicîh bikin. Wek Rêber dibêje, heke jin azad bibe, civak jî azad dibe. Wê demê emê jî di civakeke aramtir de bijîn.»
«DIVÊ ROLÊN CIVAKÎ YÊN HATINE HÎNKIRIN WEREN HILWEŞANDIN»
Mehmet Şahin got ku ew ne biyanî ye li ser mijarên kargehê. Wî bala xwe da rolên civakî yên ku ji me re hatine hînkirin. Şahin got: «Li vir em li ser mijarekê nîqaş dikin. Ew jî rolên civakî ne, yên ku ji me re hatine hînkirin. Mînak, çiqas jina min li malê li ber min biçûk bibe, ez ewqas mêr im. Heke ev nebe, di civakê de dibêjin ez di bin destê jina xwe de me. Divê em vê mentalîteyê hilweşînin û têk bibin. Gihîştina kesayetiyên ku Rêber destnîşan kirine, ji bo me pir zehmet e. Lê divê em keda, hewl û hêza pêwîst nîşan bidin. Her ku ev xebat zêde bibin, şikandina mentalîteya desthilatê ewqas bileztir dibe.»
«PÊWÎSTÎ BI BERHEVOKA FELSEFÎK Û ÎDEOLOJÎK HEYE»
Fethi Tapaç ku welatiyekî Ereb e, got kargeha mêraniyê ji bo guherîn û veguherîna civakî girîng e. Wî got mentalîteyeke bavsalarî li her qada jiyanê heye. Tapaç got: «Emê hindek din jî vê yekê bijîn. Ji bo ku ev biguhere, pêwîstî bi çand, berhevok û hişyariyê heye. Divê em di warê felsefîk û îdeolojîk de bingehê vê yekê ava bikin. Ji ber vê yekê jî divê mirov sebir bike. Çimkî mirovên ku ev hêz gihîştiye destê wan, ne hêsan e ku wê berdin. Lê ez difikirim em dikarin bi perwerdehiyê vê yekê derbas bikin.»
Tapaç behsa bandora mentalîteya bavsalarî ya di nav gelê Ereb de jî kir. Wî got: «Bi taybetî em wek gelê Ereb ê ku li Rihayê dijî, vê yekê bi awayekî tund dijîn. Mînak, di civaka Ereb a ku ez tê de dijîm, jinek dikare ji mêrê xwe re bibêje: 'Here careke din bizewice da ku ez ji te xelas bibim.' Ev bûye çand û kevneşopiyek. Jinan jî ev yek li xwe kirine adet. Di pejirandina pirjiniyê, desthilatiya ku didin mêr, û naskirina mêr wek nirxek bêqisûr de para jinan jî heye. Ji ber vê yekê pêwîst e jin jî bi me mêran re biguherin.»
«GELÊ EREB JI NÊZ VE LI TEVGERA KURD TEMAŞE DIKE»
Tapaç got mentalîteya bavsalarî ya di civakê de ji aliyê dewletê ve tê xwedîkirin. Wî got: «Ne civak ne jî dewlet naxwazin hêza di destê mêr de ji wî bê stendin. Çimkî gava desthilatiya mêr biçe, desthilatiya dewletê jî wenda dibe. Ji ber vê yekê veguherîn û guherîn şert e. Divê guherîn û veguherîn pêşî ji mêr dest pê bike.»
Tapaç bala xwe da guherîna ku bi têkoşîna Tevgera Azadiya Kurd derketiye holê. Wî got: «Mirov bi têkoşînê digihîje dîrok, hebûn û nasnameya xwe. Ev jî pêşengiya guherîn û veguherîna gelên Kurdistanê dike. Ji ber vê yekê em wek gelê Ereb ji nêz ve li Tevgera Azadiya Kurd temaşe dikin. Em jî parê xwe, çiqas hindik be jî, digirin.»