هەواڵگری ئەمریکا: ئێران هێشتا تا 2500 مووشەکی هەیە؛ ڕاپۆرت پێچەوانەی وتەی تڕامپە کە دەڵێ 'سوپای ئێران تێکشکێنراوە'

Rastinews — بەرپرسانی ئەمریکایی لەگەڵ وۆڵ ستریت جۆرناڵدا قسەیان کرد و ڕایانگەیاند کە یەکەکانی هەواڵگری هەڵسەنگاندنیان ئەوەیە ئێران نێوان 1500 تا 2500 مووشەکی هەیە.

بەرپرسانی ئەمریکایی ئاماژەیان بەوەدا کە ئەم هەلسەنگاندنە 'بڕوایەکی کەم'ی هەیە. دیاریکردنی ژمارەی ئەو مووشانەی ئێران کە ئامادەن بۆ هاوێشتن و ئەوانەی لە کۆگاکاندان، کارێکی ئاسان نییە. لەگەڵ ئەوەشدا، بەگوێرەی بەرپرسان، ڕوونە کە تاران کۆگایەکی گەورەی مووشەکی هەیە.

هەلسەنگاندنی بەرپرسانی سوپای ئیسرائیلیش لە هەمان ئاستدایە. بەگوێرەی ئیسرائیل، ئێران زیاتر لە 1500 مووشەکی بالیستیکی هەیە.

دووبارە چەکدار دەبنەوە

پەلاماری ئەمریکا و ئیسرائیل کۆگا و کارگەکانی بەرهەمهێنانی مووشەکی ئێرانی لێدا بوو. لەگەڵ ئەوەشدا، بەرپرسێکی ئیسرائیلی لەگەڵ وۆڵ ستریت جۆرناڵدا ڕایگەیاند کە تاران خۆی بۆ ململانێیەکی نوێ ئامادە دەکات.

ئەو بەرپرسە گوتی: 'ئەوان دووبارە بنیات دەنێنەوە، دووبارە چەکدار دەبنەوە.'

سیمۆن لیدین، کە لە دەوری یەکەمی تڕامپدا جێگری وەزیری بەرگری ئەمریکا بووە بۆ کاروباری ڕۆژهەلاتی ناوەڕاست، ئاماژەی بەوەدا کە تەنانەت لاوازترین هەلسەنگاندنیش بەهای گرنگی هەیە. بەگوێرەی لیدین، 1500 مووشەک بەو مانایەیە کە ئێران زیاتر لە نیوەی کۆگای پێش جەنگی خۆی دووبارە پڕکردووەتەوە.

وۆڵ ستریت جۆرناڵ نووسیویەتی کە ئەم ڕاستییە پێچەوانەی ئەو قسانەیە کە حکوومەتی تڕامپ دەیکەن سەبارەت بەوەی سوپای ئێران تێکشکێنراوە.

چەند کاتژمێر دوای ڕاپۆرتەکە، پەلامار بۆ بەحرێن

ئەم هەواڵە چەند کاتژمێر پێش ئەوە بڵاوکرایەوە کە سپای پاسدارانی شۆڕشی ئیسلامی ئێران ڕایگەیاند بنکەیەکی ئەمریکا لە بەحرێنی کردووەتە ئامانج. سپای پاسداران ڕایگەیاند کە پەلاماری سیستەمێکی ڕادار لەناو بنکەکەیدا داوە.

ئێران هەفتەی ڕابردوو 'شاری مووشەکی' نوێی ژێرزەوی ئاشکرا کرد. بەرپرسێکی وڵاتانی ڕۆژاوا لەو کاتەدا بۆ بلومبێرگ ڕایگەیاند کە ئێران لانیکەم 1700 مووشەکی بالیستیکی ماوەتەوە و مانگانە تا 50 مووشەکی نوێ بەرهەم دەهێنێت.