سارالییەکان و شاهینییەکان لە ناوەندی گشتی مەهەپەدا ئاشتییان کردەوە
بنەماڵەی سارال و شاهین کە بە جیهانی ژێرزەمین ناسراون و نزیکەی 22 ساڵە دوژمنایەتییان لەنێواندایە، نوێنەرانیان لە ژووری کاری سەرۆکی گشتیی مەهەپە دەولەت باغچەلی کۆبوونەوە و دەستیان بەیەکدا گرت. مەهەپە ئەم کۆبوونەوەیەی بەناوی «باوەشکردنەوەیەکی مێژووی» ڕاگەیاند.
Rastinewsبورهانەتین سارال، لە بنەماڵەی سارال، لەگەڵ سەدات شاهین کە بەسەرکردەی گروپی شاهین ناسراوە، ئێوارە لە ناوەندی گشتی مەهەپە لە ئەنقەرە لەگەڵ باغچەلی کۆبوونەوەیان کرد. دوای کۆبوونەوەکە وێنەی هەرسێکیان بڵاوکرایەوە.
لە بەیاننامەیەکی هەژماری فەرمی تۆڕی کۆمەلایەتی مەهەپەدا، ئەم دوو گروپە بەنێو «دوو بنەماڵەی بەنرخی وڵاتمان» باس کراون. هەروەها لە بەیاننامەکەدا هاتووە کە لەگەڵ باغچەلی لە ناوەندی گشتیدا «باوەشکردنەوە و کۆبوونەوەیەکی مێژووی» ڕووی داوە.
کۆبوونەوەکە دوای هێرشێکی پۆلیس ڕووی دا
بەپێی هەواڵی میللی گازیتە، ئەم کۆبوونەوەیە دەستبەجێ دوای هێرشێکی پۆلیس ڕووی داوە کە بەهۆی گومانی ئامادەکاریی یاکوب کەرەم سارال بۆ کوشتنی سەدات شاهین ئەنجام دراوە. بەپێی هەمان هەواڵ، لە هێرشەکەدا ڕۆکێتئاڤێژ و چەکی ئۆتۆماتیکی زۆر بەدەستەوە گیراوە.
بنەماڵەی سارال پێش کۆبوونەوەکە لە ئەنقەرە، لە شارۆچکەی سورمنێی پارێزگای تەرابزۆن کۆبوونەوەیەکی بەبەشداریی بەرچاویان ڕێکخستبوو.
کۆبوونەوەی باغچەلی و شاهین یەکەم جار نییە
سەدات شاهین ساڵی 2023، دوای ئازادبوونی لە بەندیخانە، جارێکی تر باغچەلیی لە ژووری کاری لە ناوەندی گشتی مەهەپەدا سەردانی کردبوو. کێشەکە لەنێوان ئەم دوو گروپەدا لە ماوەی چەند ساڵێکدا بەهۆی چەندین لێکۆلینەوە و دۆسیەی دادگایی هاتووەتە ئاراوەی ڕای گشتی.
کۆبوونەوەکە لە کاتێکدا ئەنجام درا کە پرۆسەی باغچەلی، کە پاشەڵوێزی 2024 دەستیپێکرد و بەناوی «تورکیای بێ تیرۆر» ناسراوە و پەیوەستە بە کێشەی کورد، هێشتا بەردەوامە. ماڵپەری سەربەستییەت ئەم هەواڵەی بە سەردێڕی «دیسان پرۆسەیەکی چارەسەرکردن لە باغچەلییەوە» بڵاوکردەوە.