پس ٢١ ساڵ گەڕان، گۆڕی کوڕەکەی لە وێنەی تەلەفزیۆن دۆزییەوە
خێزانی گەزیجی کە لە وان دەژیێن، گۆڕی کاهرامان گەزیجی، ئەندامی پەکەکە کە ساڵی ٢٠٠٥ گیانی لەدەستدا، پاش ٢١ ساڵ لە ڕێگەی وێنەکانی بەرنامەیەکی تەلەفزیۆنییەوە دۆزییەوە. دایکی، حەیریە گەزیجی، لەگەڵ کوڕەکەی دیکەی فیدای گەزیجی چوونە گابار بۆ سەردانی گۆڕەکە.
Rastinewsخێزانی گەزیجی کە لە وان دەژیێن، ٢١ ساڵ بوو بەدوای گۆڕی کاهرامان گەزیجیدا دەگەڕان، ئەندامی هێزەکانی هەپەگە (HPG)ی چەکداری پەکەکە، تا کە بەهۆی وێنەیەک کە لە بەرنامەیەکی تەلەفزیۆنیدا بڵاوکرایەوە، شوێنی گۆڕەکەیان دۆزییەوە.
بەپێی هەواڵی ئاژانسی میزۆپۆتامیا (MA)، خێزانەکە کاتێک بەرنامەیەکیان لە نووچە تیڤیدا سەیر دەکرد کە وێنەی گۆڕستانێکی گاباری تێدا نیشان دەدرا، گۆڕی گەزیجییان بەدیکرد.
کاهرامان گەزیجی کە ناوی خۆی وەک «کەندال تاتڤان» بەکارهێنابوو، ساڵی ٢٠٠٥ لە شەڕێکدا لە شارۆچکەی ئیدل (حەزەخ)ی شرنخ گیانی لەدەستدابوو، ئەمەش لەو کاتەدا ڕاگەیەنرابوو.
دایک و برای گەیشتنە گابار
پاش بینینی وێنەکان، دایکی حەیریە گەزیجی لەگەڵ برای فیدای گەزیجی لە وانەوە چوونە شرنخ و سەردانی گۆڕستانەکەیان کرد.
گۆڕستانەکە لەدوای ساڵی ٢٠١٥ داخرا بۆ سەردان
گۆڕستانی تایبەت بە ئەندامانی هەپەگە لە هێرشێکی ئاسمانیدا لە ساڵی ٢٠١٥دا تێکدرا. دوای ئەوەی ناوچەکە بە «ناوچەی ئاسایشی سەربازی» ڕاگەیەنرا، گۆڕستانەکە ماوەیەکی درێژ داخرا بوو بۆ سەردانکردن.
کێوی گابار و دەوروبەری لە شرنخ لە ساڵانی دواتریشدا بە بڕیاری پارێزگاری چەند جارێک بە «ناوچەی ئاسایشی تایبەتی کاتی» ڕاگەیەنرا. لە بڕیارەکانی کانوونی یەکەمی ٢٠٢٣ و ئایاری ٢٠٢٤دا، چوونەژوورەوەیی ناوچەکە بە پاساوی «ئاسایشی گیان و ماڵ» قەدەغە کرابوو.