مەزلوم عەبدی لەگەڵ فەرمانداری حەلەب باسی پرۆسەی یەکگرتنیان کرد
مەزلوم عەبدی لە حەلەب لەگەڵ عەزام ئەل‌غەریب فەرمانداری حەلەب و قاسم ئەل‌عەواد فەرماندەی کۆرپسی دووەم کۆبووەوە. لە کۆبوونەوەکەدا باسی یەکگرتنی دەزگا سەربازی، مەدەنی و خزمەتگوزارییەکان و گەڕانەوەی دانیشتووانی عەفرین، شێخمەقسود و ئەشرەفیێ کرا.
Rastinewsمەزلوم عەبدی، ڕاوێژکاری سەرۆکایەتی سووریا، لە حەلەب کۆبووەوە لەگەڵ عەزام ئەل‌غەریب فەرمانداری حەلەب و بریگادیێر قاسم ئەل‌عەواد فەرماندەی کۆرپسی دووەم.
ئەم کۆبوونەوەیە لە بینای فەرمانداری حەلەب بەڕێوەچوو و تێیدا باسی یەکگرتنی دەزگا سەربازی، مەدەنی و خزمەتگوزارییەکان کرا، هەروەها هەنگاوەکانی داهاتوو بۆ تەواوکردنی پرۆسەکە.
لە کۆبوونەوەکەدا ئیلهام ئەحمەد، مەحموود بەرخودان فەرماندەی تیپی کۆبانی، خەزنە نەبی ئەندامی کۆمیتەی یەکگرتن و بەڕێوەبەری ناحیەی کۆبانیش بەشدار بوون.
هەروەها لە کۆبوونەوەکەدا باس لە دۆخی ناوچەکانی کە پرۆسەی یەکگرتنیان تێدا بەردەوامە کرا، لەگەڵ گەڕانەوەی دانیشتووانی عەفرین، شێخمەقسود و ئەشرەفیێ بۆ ماڵەکانیان و ڕێکخستنە کارگێڕی و خزمەتگوزارییەکانی پێویست بۆ پرۆسەی گەڕانەوە. هەروەها باسی هاوکاری نێوان دەزگا پەیوەندیدارەکان بۆ بەردەوامبوونی خزمەتگوزارییەکان لە ناوچەکاندا کرا.
ئاژانسی فەرمی هەواڵی سووریا SANA ناوی تەواوی عەبدی بە "مستەفا خەلیل عەبدی، ڕاوێژکاری سەرۆکایەتی" باڵاو کردەوە، بەڵام وردەکاری ناوی ئەو کەسانەی دیکەی بەشدار لە کۆبوونەوەکە نەیدا. لەلایەکی دیکەوە، ئاژانسی ANHA وردەکاری دەلەگە و ناوچە باسکراوەکانی ڕاگەیاند.