پزیشکیان: پەیوەندی نێوان ئێران و هەرێمی کوردستان دەبێت بەهێز بێت
سەرۆکی ئێران مەسعود پزیشکیان، لە دیدارێکدا لەگەڵ بافڵ جەلال تاڵەبانی سەرۆکی یەکێتی نیشتمانی کوردستان لە تاران، ئاماژەی بەوە دا کە پەیوەندییەکانی نێوان ئێران و هەرێمی کوردستان پێویستە پەرەیان پێبدرێت.
Rastinewsمەسعود پزیشکیان سەرۆکی ئێران، دوێنێ لە پایتەخت تاران دیداری لەگەڵ بافڵ جەلال تاڵەبانی سەرۆکی یەکێتی نیشتمانی کوردستان (یەکێتی) کرد. لە کۆبوونەوەکەدا، پەیوەندییەکانی نێوان ئێران و هەرێمی کوردستان بە درێژی گفتوگۆی لەسەر کرا.
پزیشکیان ئاماژەی بەوە دا کە پەیوەندییە مێژوویی، کولتووری و کۆمەڵایەتییەکانی نێوان ئێران و هەرێمی کوردستان دەگەڕێتەوە بۆ ماوەیەکی زۆر دوور، وتی: "ئەم پەیوەندییانە بۆ کۆماری ئیسلامی ئێران گرنگییەکی تایبەتیان هەیە و پێویستە پەرەیان پێبدرێت."
"ئامادەین کێشەکان بە تێگەیشتنی دوولایەنە و دیالۆگ چارەسەر بکەین"
سەرۆکی ئێران کە ئاماژەی بەوە دا پێویستە هاوکاری و نزیکبوونەوە لەنێوان وڵاتانی ناوچەکە زیاتر بێت، گوتی: "باوەڕمان وایە گەلانی ناوچەکە پەیوەندی قووڵ و ڕەگدارییان هەیە و پێویستە بەپشتبەستن بەم بنەما هاوبەشانە، ڕێگا بۆ هاوکاری، جێگیری و گەشەپێدان بکرێتەوە."
پزیشکیان کە تیشکی خستە سەر دیالۆگ لە چارەسەرکردنی کێشەکان، وتی: "ئەگەر هەندێک لایەن داواکاری یاسایی هەبێت، ئێمە ئامادەین لە چوارچێوەی تێگەیشتن و ڕێزی دوولایەنەدا کێشەکان ببینین و چارەسەریان بۆ بدۆزینەوە. هەروەها چاوەڕوانین هەموو لایەنەکان پابەندی بنەماکانی دراوسێیەتی باش بن و دووربکەونەوە لە توندڕەوی و کارە هەڵەکان."
تاوانبارکردنی ئەمریکا بە "دەستێوەردان"
پزیشکیان کە بوونی ئەمریکای لە ناوچەکەی بە "دەستێوەردان" لە کاروباری ناوخۆیی وڵاتان ناوی برد، بەم شێوەیە قسەکانی بەردەوام کرد:
"ئەوان بەدوای ئەوەدان کە بە دروستکردنی ناکۆکی و ململانێ لەنێوان گەلانی ناوچەکە، توانای وڵاتان لاواز بکەن و سەرچاوە و سامانەکانیان بچەوسێننەوە. لەبەر ئەوە پێویستە بە زیادکردنی هاوکاری و دیالۆگ، زەمینەی ناجێگیری و ململانێ کەم بکەینەوە."