کاراسو: قەندیل کەناڵی پەیوەندی ڕاستەوخۆی هەم لەگەڵ ئیمرالی و هەم لەگەڵ دەوڵەت هەیە
مستەفا کاراسو، یەکێک لە بەرپرسانی پەکەکە، ڕایگەیاند کە قەندیل کەناڵی پەیوەندی ڕاستەوخۆی هەم لەگەڵ عەبدوڵا ئۆجەلانی لە ئیمرالی و هەم لەگەڵ بەرپرسانی دەوڵەت هەیە، کە تێیدا بۆچوونی هەردوولا بۆ یەکتر دەگوازرێتەوە.
Rastinewsمستەفا کاراسو، یەکێک لە بەرپرسانی پەکەکە، لە چاوپێکەوتنێکدا لەگەڵ ڕۆژنامەنووس ئێردال ئێر ڕایگەیاند کە قەندیل لە چوارچێوەی پرۆسەی بەردەوامدا، هەم لەگەڵ عەبدوڵا ئۆجەلان و هەم لەگەڵ بەرپرسانی دەوڵەتدا لە پەیوەندیدایە. کاراسو گوتی بەرپرسانی پەکەکە و نوێنەرانی دەوڵەت "لە هەندێک شوێن" ڕووبەڕووی یەکتر دەبنەوە و لەسەر هەندێک بابەت هەنگاوی کرداری هەڵدەگیرێت.
ئەندامی ئەنجومەنی جێبەجێکاری کۆما جڤاکێن کوردستان (KCK)، مستەفا کاراسو، ڕایگەیاند کە لە نێوان قەندیل و ئیمرالیدا کەناڵێک هەیە کە بۆچوونی هەردوولایان پێیدا دەگوازرێتەوە، وتی: "پەیوەندیمان لەگەڵ ئیمرالی هەیە. کەناڵێک هەیە کە بۆچوونەکان بە هاتوچۆیی پێیدا دەڕۆن."
بەڵام ئەوەی زیاتر جێی سەرنجی وتەکانی کاراسو بوو، ئەوە بوو کە ڕایگەیاند پەیوەندییەکان تەنها لە ناردنی پەیام لە نێوان قەندیل و ئیمرالیدا سنووردار نین. کاراسو ئاماژەی بەوەشدا کە بەرپرسانی پەکەکە و بەرپرسانی دەوڵەت هەندێک جار ڕاستەوخۆ کۆدەبنەوە، وتی:
"هەندێک بەرپرس لەگەڵ هەندێک لە هاوڕێکانمان لە هەندێک شوێن دادەنیشن و گفتوگۆ دەکەن، دەبیننەوە. لەسەر هەندێک بابەت هەنگاوی کرداری هەڵدەگیرێت."
کاراسو ڕایگەیاند کە لە کۆبوونەوەکاندا ڕەخنە و ناڕەزایەتییەکانی هەردوولا سەبارەت بە پرۆسەکە بە شێوەیەکی دووالیەنە دەگوازرێتەوە، وتی: "دەوڵەت ناڕەزایەتی خۆی هەیە، ئەوە ڕادەگەیەنرێت و گفتوگۆی لەسەر دەکرێت. کاتێک ئێمەش ناڕەزایەتیمان هەبێت، هاوڕێکانمان لەگەڵ بەرپرسانی دەوڵەت کۆدەبنەوە."
کاراسو بەم پەیوەندییانەی وەک بەشێکی سروشتی و پێویستی گەڕان بەدوای چارەسەردا لێکدایەوە و پرسیاری کرد: "ئەگەر هیچ پەیوەندییەکمان لەگەڵ دەوڵەت نەبێت و هیچ ئاڵوگۆڕێکی بۆچوونمان لەگەڵ ئیمرالی نەبێت، ئەم کێشەیە چۆن چارەسەر دەبێت؟"