ئۆجەلان: «وەک دامەزراندنی کۆمار گرنگە»
Rastinewsتیمی ئیمرالی پارتی دەم، دوای چاوپێکەوتنیان لەگەڵ عەبدوڵڵا ئۆجەلان ڕایگەیاندنێکیان بڵاوکردەوە.
ئۆجەلان لە چاوپێکەوتنەکەدا، پرۆسەی یاسایی نوێی بە هەنگاوێکی دیموکراتیزەکردن وەسف کرد کە «وەک دامەزراندنی کۆمار گرنگە» و وتی: «ڕێگای هەزار کیلومەتر بە یەک هەنگاو دەست پێدەکات.»
ئۆجەلان وتیشی: «هێشتا هەموو شتێک چارەسەر نەکراوە، بەڵام هیچ بارودۆخێکیش نییە پێویستی بە هەڵوێستی نەرێنی بکات. ئەو یاسایەی سیاسەت دەریدەکات، وەک کلیلێک ڕێگا بۆ ئەم پرۆسەیە دەکاتەوە. دەرگا بۆ کۆماری دیموکراتیک هەتا کۆتایی کراوەیە.»
«وەک دامەزراندنی کۆمار گرنگە»
ئۆجەلان ئەم هەڵسەنگاندنەی خستە ڕوو:
«بەم یاسایە، بۆ چارەسەرکردنی کێشەیەکی مێژوویی ڕێگامان گرتووەتەبەر. لە سەرەتای پرۆسەیەکی دیموکراتیزەکردنداین کە لانیکەم وەک دامەزراندنی کۆمار گرنگ دەبێت. هەروەک لە دامەزراندنی کۆماردا چ چاودانی و قوربانیدانێک کرابوو، ئێستاش پێویستە بەهەمان توندی بۆ کۆماری دیموکراتیک کاربکرێت.»
ئۆجەلان ڕایگەیاند کە هەنگاوە داهاتووەکان تەنها کاریگەری لەسەر کوردەکان نابێت، بەڵکو هەموو تورکیا و ناوچەکەش دەگرێتەوە، هەروەها ئاماژەی بە دەستکەوتە ئابووری و یاساییەکانی پرۆسەکە دا. لە پەیامەکەیدا وتی: «ئەم هەنگاوە، ڕێگا بۆ پەرەپێدانی یاسای دیموکراتیک و گەشەکردنی دەرفەتە ئابوورییەکان دەکاتەوە. ئەمە خزمەتێکی گەورەیە بۆ 86 ملیۆن کەس.»
ئۆجەلان لە چاوپێکەوتنەکەدا بیری هێنایەوە کە بەرپرسیارێتییەکی گەورە دەکەوێتە سەر دەزگای سیاسەت، وتیشی بۆ سەرکەوتنی پرۆسەکە پێویستی بە هێزی ڕێکخراوی کۆمەڵگا و لێکدانەوەیەکی ڕاست هەیە. کورتەیەک لە هەڵوێستی خۆی بۆ پرۆسەکە بەم وشانە خستەڕوو:
«هێشتا هەموو شتێک چارەسەر نەکراوە، بەڵام هیچ بارودۆخێکیش نییە پێویستی بە هەڵوێستی نەرێنی بکات. ئەو یاسایەی سیاسەت دەریدەکات، وەک کلیلێک ڕێگا بۆ ئەم پرۆسەیە دەکاتەوە. دەرگا بۆ کۆماری دیموکراتیک هەتا کۆتایی کراوەیە.»
لە ڕایگەیاندنەکەدا هاتووە کە ناوەڕۆکی چاوپێکەوتنەکە لە ڕووی نەخشەڕێی قۆناغی داهاتوو گرنگییەکی زۆری هەیە. تیمەکە بە جەختکردنەوە لەسەر بەردەوامیی ئۆجەلان لە بابەتی ئاشتی و دیموکراتیزەکردن، بانگهێشتی کۆمەڵگای کرد بۆ خاوەنداریەتیکردنی پرۆسەکە. دەقی تەواوی ڕایگەیاندنەکە بەمشێوەیەیە:
ئێمە وەک تیمی ئیمرالی پارتی دەم، لە ڕێکەوتی 2ی ئابی 2026دا چاوپێکەوتنێکمان لەگەڵ بەڕێز عەبدوڵڵا ئۆجەلان ئەنجامدا. لە چاوپێکەوتنەکەدا بەڕێز ئۆجەلان هەڵسەنگاندنەکانی خۆی لەسەر پرۆسەی ئێستا، کارە بەردەوامەکان و بەرپرسیارێتییە مێژووییەکانی قۆناغی داهاتوو خستەڕوو، هەروەها ئەو پەیامانەی کە دەیویست بگاتە کۆمەڵگا بۆ تیمەکەمانی ڕادەگەیاند.
پەیامەکانی بەڕێز ئۆجەلان بەمشێوەیەن:
«ڕێگای هەزار کیلومەتر بە یەک هەنگاو دەست پێدەکات.
«بەم یاسایە، بۆ چارەسەرکردنی کێشەیەکی مێژوویی ڕێگامان گرتووەتەبەر. لە سەرەتای پرۆسەیەکی دیموکراتیزەکردنداین کە لانیکەم وەک دامەزراندنی کۆمار گرنگ دەبێت.
«هەروەک لە پرۆسەی دامەزراندنی کۆماردا کارێکی گەورە و قوربانیدانێکی بەرچاو نیشاندرا، ئێستاش پێویستە بەهەمان جددییەت بۆ کۆماری دیموکراتیک کاربکرێت.
«ئەمە تەنها پێویستی کورد یان لایەنێک نییە، بەڵکو پێویستی هەموو ئەوانەیە کە لەم خاکەدا دەژین. هەنگاوێک کە دەبردرێتەپێش، کاریگەری لەسەر چارەنووسی وڵات و ناوچەکە دادەنێت، دەرگا بۆ پەرەپێدانی یاسای دیموکراتیک و گەشەکردنی دەرفەتە ئابوورییەکان دەکاتەوە. ئەمە خزمەتێکی گەورەیە بۆ 86 ملیۆن کەس.
«بە ڕێکخراوبوونی کۆمەڵگا دەرچوونێکی مێژوویی دەکەین. ئەم هەنگاوە بەشداریەکی گەورەی لە ئاشتی و ئابووریدا دەبێت.
«هێشتا هەموو شتێک چارەسەر نەکراوە. بەڵام هیچ بارودۆخێکیش نییە پێویستی بە هەڵوێستی نەرێنی بکات. گرنگ ئەوەیە ئەم هەنگاوە بەدروستی تێبگەیشرێت و هەموو کەس بۆ سەرکەوتنی پرۆسەکە بەرپرسیارێتی وەربگرێت.
«ئەو یاسایەی سیاسەت دەریدەکات، وەک کلیلێک ڕێگا بۆ ئەم پرۆسەیە دەکاتەوە. دەرگا بۆ کۆماری دیموکراتیک هەتا کۆتایی کراوەیە.»
سەرچاوە: ڕووداو