کەراسوو: «هەواڵێکی کورتمان بۆ هات، وترا ڕای ئێمەش وەردەگیرێت»
Rastinewsئەندامی ئەنجومەنی جێبەجێکاری کۆما جڤاکێن کوردستان (KCK)، مستەفا کەراسوو، هەڵسەنگاندنی خۆی سەبارەت بە ڕەشنووسی ئەو یاسایە دەربڕی کە ڕێگا بە دابەزینی ئەندامانی پەکەکە لە چیاکان دەدات. کەراسوو ڕایگەیاند کە جگە لەوەی لە میدیاکاندا باڵاو بووەتەوە، ئاگاداریی سنووردارێکیشیان پێگەیشتووە.
کەراسوو کە وتی بەم زووانە زانیاریی گشتگیر لەبارەی وردەکارییەکانی چاوپێکەوتنە 5 کاتژمێرەکەی ئیمرالی پێیان دەگات، گوتی: «جگە لەوەی لە ڕێگەی میدیاکانەوە باڵاو بووەتەوە، هەواڵێکی کورتمان بۆ هات. وترا کە بەم زووانە دەربارەی ئەو چاوپێکەوتنە 5 کاتژمێرییە ئاگادارمان دەکەنەوە و ڕای ئێمەش وەردەگیرێت.»
ئۆجەلان: لەڕوانگەی کردنەوەی دەرگایەکەوە دەستپێکێکە
کەراسوو ئاماژەی بەوە دا کە ڕەشنووسێک پێشکەشی ئەبدوڵا ئۆجەلان کراوە و ئۆجەلانیش هەڵوێستێکی «وریایانە بەڵام بنیاتنەرانە»ی لەبەرامبەریدا نواندووە، ئەم بۆچوونانەشی سەبارەت بە پرۆسەکە خستە ڕوو:
«ڕەشنووسێکیان بۆ ڕابەر ئاپۆ بردووە. ڕابەر ئاپۆش دەربارەی ئەم ڕەشنووسە وتوویەتی: 'لەوانەیە کەموکوڕی و پێداویستی تێدابێت، بەڵام لەڕوانگەی کردنەوەی دەرگایەکەوە دەستپێکێکە'، وە ڕایگەیاندووە کە دەبێت بەم شێوەیە تەماشای بکرێت.
«گەل نیگەرانە، دەبێت چەسپاو بمێنینەوە»
کەراسوو ئاماژەی بەوە دا کە «لەنێو گەل و لایەنە دۆستەکاندا نیگەرانیی بەجێ هەیە»، وە جەخت لەوەشی کردەوە کە سەرکەوتنی پرۆسەکە پەیوەستە بە چۆنیەتی هەڵوێستی لایەنی کوردی.
کەراسوو گوتی: «بێگومان بەهۆی هەڵوێستی دەسەڵاتەوە نیگەرانی لەنێو گەل و دۆستەکانماندا دروست دەبێت. ئێمە زیاتر لەوەی نیگەران بین، هەڵوێستمان لەسەر ئەوە دیاری دەکەین کە پرۆسەکە پێویستە چۆن بەرەوپێش بچێت. بۆ بەرەوپێشچوونی پرۆسەکە پێویستە گەلی کورد بە هێزی ڕێکخراوەیی خۆی چەسپاو بمێنێتەوە.»
مستەفا کەراسوو لە گفتوگۆیەکدا لەگەڵ Medya Haber، ڕایگەیاند کە ڕەشنووسی یاساکە وەک هەنگاوێکی سەرەتایی دەبینن و بەم شێوەیە قسەی کرد:
«دوو مانگ بوو چاوپێکەوتن لەگەڵ ڕابەر ئاپۆ ئەنجام نەدەدرا. ئەمە لە بنەڕەتدا شتێکی پێچەوانەی سروشتی پرۆسەکەیە. ئەمە بابەتێکی ئەوەندە گرنگە. خۆیشیان بەگرنگ هەڵیدەسەنگاند. دەیانوت کێشەیەکی سەدەیەک تەواو دەبێت و ئاسۆی نوێ لەبەردەم تورکیا دەکرێتەوە. بەڵام لە بابەتێکی وا گرنگدا، دوو مانگ چاوپێنەکەوتنی ڕابەر ئاپۆ، سەرەکی وتووێژکاری گەلی کورد، بەناچاری ئەم پرسیارەی هێنایە پێش ئێمە و لایەنە دیکەکانیش کە: باشە، چی ڕوودەدات؟ ئێمە ئەمەمان ڕەخنە گرت، هەڵوێستی خۆمانمان دەرخست، جەخت لەسەر ئەوەمان کردەوە کە دەوڵەت پێویستە چۆن هەڵوێست بگرێت. دوای ئەم هەڵسەنگاندنانەمان، دوو مانگ دواتر چاوپێکەوتنێک لەگەڵ ڕابەری کرا. بێگومان ئەنجامدانی ئەم چاوپێکەوتنە لەلایەکەوە ئەوەی نیشان دەدا کە، باشە، هەندێک کێشە هەیە، بەڵام گفتوگۆش هەیە بۆ چارەسەرکردنی ئەو کێشانە. ئێمە بەم چاوپێکەوتنە هەڵسەنگاندمان ئەوە بوو کە ویستراوە ئەو کێشانە چارەسەر بکرێن. بەڕاستیش چاوپێکەوتنەکە ئەنجام درا. شاندێک لە پارتی دەم چووبووە ئەم چاوپێکەوتنە. ڕایانگەیاند. جەخت لەسەر ئەوە کرابوو کە هەڵوێستی ڕابەری هەیە، بە تایبەت دژ بەوەی هەڵوێستێکی تەسک و سادە بەرامبەر بە دەوڵەت وەربگیرێت. ئاشکرایە کە دووبارە پێکهاتنەوەی برایەتیی تورک-کورد و ئامادەیی گەلی کورد بۆ ئەم برایەتییە پێویستە لەسەر بنەمای مافەکان، لەسەر بنەمای مافە بنەڕەتییەکانی گەلی کورد بێت. ئێمەش هەر ئەمە دەڵێین. لایەنە بەرامبەرەکانیشمان ئەمە دەزانن. لەم ڕووەوە، جگە لەوەی لە میدیاکانەوە باڵاو بووەتەوە، هەواڵێکی کورتمان بۆ هات. وترا کە بەم زووانە دەربارەی ئەم چاوپێکەوتنە 5 کاتژمێرییە ئاگادارمان دەکەنەوە و ڕای ئێمەش وەردەگیرێت. ڕابەر ئاپۆ هەڵوێستێکی وای نواندووە، ڕەشنووسێکیان بردووەتە لای ڕابەر ئاپۆ و تێیدا ڕاوەستاون.
«بەرچاو دەکەوێت کە ڕێککەوتن ڕوویداوە»
ڕابەر ئاپۆ سەبارەت بەم ڕەشنووسە وتوویەتی کە لەوانەیە کەموکوڕی و پێداویستی تێدابێت، بەڵام هەنگاوێکە، لەڕوانگەی کردنەوەی دەرگایەکەوە دەستپێکێکە. ڕایگەیاندووە کە دەبێت بەم شێوەیە تەماشای بکرێت. واتە بەڕوونی، باشە، لەوانەیە یاسایەکی وا هەبێت، لەوانەیە دەستپێکێک بێت، بەڵام پێویستە دواتریش هەبێت؛ ئەم هەڵسەنگاندنەی ڕابەر ئاپۆیە. ئێمەش بێگومان لە چاوەڕوانی ڕەشنووسەکەداین. لە ماوەیەکدا ڕەشنووسێک لە ڕێگەی میدیاکانەوە باڵاو کرابووەوە، ئەویش پێمان گەیشتبوو. ئەو ڕەشنووسە لایەنی جێی پەسەندکردنی بەڕاستی تێدا نەبوو. دەرکەوت کە بەگفتوگۆکردنی لەسەر ئەو ڕەشنووسە، جۆرە ڕێککەوتنێک ڕوویداوە. بۆ نموونە، بەتایبەت بەکارهێنانی چەمکی وەک ڕێکخراوی تیرۆریستی سەبارەت بەم پرۆسەیە. ئێمە پارتیمان هەڵوەشاندەوە، شەڕی چەکداریمان دژ بە تورکیا کۆتایی پێهێنا. لەسەر بنەمای ستراتیژی خەباتی سیاسی دیموکراتیک، کاتێک بارودۆخ ڕەخساو بێت و ئازادیی بیر و ڕێکخراوبوون بەتەواوی هەبێت، واتە لە کاتی ڕێکخستن، دەربڕینی بیرۆکە، هەڵسەنگاندن و ڕێکخستنەکانی پەیوەندیدار بە چارەسەری کێشەی کورد و دیموکراتیزەکردن هیچ کۆسپێک لەبەردەم نەبێت، ئێمە پێشتریش گوتوومانە کە دەتوانین بچینە ناو خەباتی سیاسی دیموکراتیکەوە. ئەمە بەڕاستی مەبەستی ئێمەیە. ئێمە پرۆسەکە بەدروستی دەزانین و پشتیوانیشی لێ دەکەین. بێگومان بەهۆی هەڵوێستی دەسەڵاتەوە نیگەرانی لەنێو گەلدا هەیە، نیگەرانی لەنێو دۆستەکانیشماندا هەیە. ئێمە زیاتر لەوەی نیگەران بین، هەڵوێستمان و بیرۆکەمان لەسەر ئەوە دەردەبڕین کە پرۆسەکە پێویستە چۆن بەرەوپێش بچێت. لەلایەکی دیکەوە، ئەمەش هەمیشە دەزانین: کێشەکە تەنها ئەوە نییە کە دەوڵەت چ هەنگاوێک هەڵدەگرێت یان نا و ئێمە تەنها چاوەڕوانی بین. پێویستە هێزە دیموکراتیکەکان و گەلی کورد بە هێزی ڕێکخراوەیی خۆیان چەسپاو بمێننەوە و هەڵوێستی خۆیان دەربخەن، ئەمە بۆ دیاریکردنی ئاڕاستەی پرۆسەکە پێویستە. ئێمە هەمیشە ئەمەمان گوتووە. ئەوەی پێویستە هەر ئەمەیە. ئێمە ئەگەر شتێک بێتە بەردەممان هەڵیدەسەنگێنین. وەک ڕابەر ئاپۆ وتی، ئەگەر دەستپێکێک بێت، ئەگەر دەرگایەک بکرێتەوە، بەلایەنی کەمەوە ئەگەر ببێتە هەنگاوی سەرەتایی بۆ پەرەسەندن و هەنگاوی نوێ لە داهاتوودا، بێگومان ئێمەش هەڵوێستێکی هاندەری پرۆسەکەمان دەبێت.»
سەرچاوە: ڕووداو