لە ئەڵمانیا متمانە بە دەوڵەت یەکەم جار گەیشتە ١٧ لە سەدا
Rastinewsلە ئەڵمانیا متمانەی خەڵک بەوەی دەوڵەت بتوانێت ئەرکەکانی جێبەجێ بکات، بە خێرایی کەم دەبێتەوە:
بەگوێرەی ڕاپرسییەکی کۆمپانیای فۆرسا کە یەکیەتی فەرمانبەرانی ئەڵمانیا (dbb) داوای کردووە و ئەنجامەکانی ڕۆژی پێنجشەممە بڵاو کرانەوە، تەنها ١٧ لە سەدی بەشداربووان متمانەیان بە دەوڵەت هەیە لەبارەی جێبەجێکردنی ئەرکەکانی.
٧٩ لە سەدی بەشداربووانی ڕاپرسییەکە پێیانوایە دەوڵەت لەبەردەم زۆری ئەرک و کێشەکان لاوازە. سەرۆکی یەکیەتییەکە، ڤۆلکەر گایەر، ئەنجامەکانی ڕاپرسییەکەی بە "کارەساتێک بۆ حکومەت" و "بانگهێشتێک بۆ ئاگاداربوونەوە" ناوبرد.
گایەر کە دەڵێت متمانە بەوەی دەوڵەت بتوانێت ئەرکەکانی جێبەجێ بکات "گەیشتووەتە نزمترین ئاست"، وتیشی: "پێویستە سیاسەت هەنگاو بنێت بۆ ڕاگرتنی ئەم دابەزینە."
بەگوێرەی بەشداربووان، ئەو بوارانەی دەوڵەت زۆرترین کێشەی تێدا هەیە، سیستەمی دابینکردنی کۆمەڵایەتی، مووچەی خانەنشینی و سیاسەتی ئابووری و دارایین. لەولاشەوە، سیاسەتی پەنابەران و داواکاری پەناگیری بەرچاو گرنگی خۆی لەدەستداوە و بۆ ڕیزەکانی دواوە کشاوەتەوە.
خزمەتگوزارییە گشتییەکانیش بەراورد لەگەڵ ساڵی ڕابردوو، بە شێوەیەکی ڕەخنەگرانەتر لەلایەن خەڵکەوە هەڵدەسەنگێنرێن. dbb لە ساڵی ٢٠٢٠ەوە ساڵانە ئەم ڕاپرسییە دەکات.
گایەر کە ڕایگەیاند حکومەتی فیدرال پێویستە هەنگاوە پێویستەکان بنێت، وتیشی: "هاوڵاتیانی ئەڵمانیا چاوەڕوانی ڕیفۆرمن کە کاریگەری ئەرێنی لەسەر ژیانیان دەبێت، گەشەی ئابووری دابین دەکات، سیستەمە کۆمەڵایەتییەکان بەهێز دەکات و دەبێتە هۆی ئەوەی دەوڵەت جارێکی تر باشتر کار بکات."
گایەر ئاماژەی بەوە دا کە وەک نموونەی بابەتی کۆچ کە لە بەراورد لەگەڵ چەند ساڵ لەمەوبەر ئێستا وەک کێشەیەکی بچووکتر لەلایەن بەشداربووانەوە سەیر دەکرێت، سیاسەت دەتوانێت کاریگەری لەسەر بۆچوونی گشتی دابنێت. وتیشی: "لەوانەیە لێرەدا پەیامێک بۆ سیاسەت هەبێت: بە هەنگاوی بەئارادا دەکرێت ئاڕاستە نەرێنییەکەی ڕاپرسییەکان بەڕاستی ڕابگیرێت."
لەو بەشەی ڕاپرسییەکەدا کە دامودەزگا فەرمییەکان هەڵدەسەنگێنرێن، خزمەتگوزاری خاوێنکردنەوەی شەقام و کۆکردنەوەی خۆڵ لەگەڵ کتێبخانە و مۆزەخانەکان باشترین ئەنجامیان بەدەستهێنا، لەکاتێکدا خراپترین نمرە درا بە وەزارەتە ئایاڵەتییەکان و بەتایبەتی وەزارەتە فیدرالییەکان. لە ڕووی پرێستیژەوە، ئاگرکوژێنەوەکان، کارمەندانی تەندروستی و پزیشکەکان لە سەرەوەی لیستەکەدان، لەکاتێکدا سیاسەتمەداران، نوێنەرانی بیمە و کارمەندانی ڕێکخراوەکانی ڕیکلام لە دواوەی لیستەکەدان.
یەکەم جارە لە ساڵی ٢٠٢٠ەوە کە یەکەم ڕاپرسی ئەنجامدرا، زیاتر لە نیوەی بەشداربووان (٥١ لە سەد) ڕایانگەیاندووە کارایی خزمەتگوزاری گشتی خراپتر بووە.
بەپێی گایەر، ئەمە زیاتر لە زیادبوونی بارگرانی کار، کەمبوونەوەی ستاف و کۆنبوونی ئامێرەکان سەرچاوە دەگرێت.
گایەر گلەیی کرد و وتی: "ساڵانێکە ئاگاداری دەدەینەوە کە بۆشایی نێوان داواکاری و توانا بەردەوام فراوانتر دەبێت، لەگەڵ ئەوەشدا سیاسەت بەردەوام ئەرکی زیاتر دەخاتە سەر شانی فەرمانبەران."
سەرچاوە: DW