Li Fransayê şaredar di bin armancê de: Zêdetir ji 100 hezar daneyan hatin dizîn

Rastinews — Di êrişa sîber a li ser malpera Komeleya Şaredarên Fransayê (AMF) de, hatiye ragihandin ku zêdetir ji 100 hezar daneyan hatine desteserkirin.

Li gorî daxuyaniya platforma French Breaches ku êrişên sîber ên li welêt tomar dike, di nav daneyên ku hatine dizîn de nav û paşnavên siyasetmedarên hilbijartî, navnîşanên e-peyamê, navên bikarhêner, şîfreyên têketinê û unwanên fermî hene.

Komeleyê di daxuyaniya xwe ya ji hesabê X de piştrast kir ku êriş rojek berî niha pêk hatiye. Li gorî daxuyaniyê, êrişê bandor li ser xebitandina pergala komputer a komeleyê nekir; kesên ku daneyên wan hatine dizîn dê li ser tedbîrên ewlehiyê yên ku divê bêne girtin bêne agahdarkirin.

Tu agahî li ser vê yekê ku êriş ji aliyê kê ve û bi kîjan sedemê hatiye kirin nehat parvekirin.

Di salekê de zêdetir ji sê sed dezgehan

Bûyer, zencîreya dawî ya pêla êrişên sîber e ku di sala 2026an de Fransa hejandiye. Di meha Nîsanê de France Titres (ANTS), a ku bi karên nasnameyê û pasaportê radibe, ketibû armancê; Wezareta Karên Hundir ragihandibû ku 11,7 milyon hesab hatine desteserkirin. Di meha havînê de Wezareta Perwerdeya Neteweyî, dezgeha bacê DGFiP û saziyên agirkujiyê jî bûne hedefa êrişan.

Hukûmeta Fransayê di nirxandina xwe ya 30ê Nîsanê de qebûl kiribû ku li welêt bi rêjeya rojane sê dizîna daneyan diqewime. Li gorî daneyên dezgeha ewlehiya sîber a Fransayê ANSSI, tenê di sala 2025an de 293 êrişên sîber ên li dijî rêveberiyên herêmî hatin kirin.

Dewamkirina êrişan tevî plana çalakiya lezgîn a ku di Nîsanê de hatibû ragihandin û di Tebaxê de hatibû berfirehkirin, rexneyên li dijî hukûmetê yên «tedbîrên têrê nayên girtin» zêde kir.