Li Volkswagen'ê plana kêmkirina 50 hezar karmendan hat pejirandin
RastinewsPlana ji nû ve avakirina giganta otomotîvê ya Almanî Volkswagen, ku dibêje heta sala 2030'an dê li seranserê cîhanê îstîxdama 50 hezar kesan kêm bike, hat pejirandin. Şîrket armanc dike ku hilberînê jî salê bi qasî 1 mîlyon erebeyan kêm bike.
Desteya Çavdêriyê ya Volkswagen'ê, piştî danûstandinên ku bi hefteyan dewam kirin, bi dengekî yekgirtî plana bi navê «Plana Pêşerojê 2030» ya ku ji aliyê rêveberiya CEO Oliver Blume ve hatibû amadekirin, pejirand.
Di çarçoveya vê plansê de tê pêşbînîkirin ku ji nêzî 650 hezar karmendên Koma Volkswagen'ê yên li seranserê cîhanê, îstîxdama 50 hezar kesan were kêmkirin. Ev hejmar bi qasî sedî 8ê tevahiya îstîxdamê pêk tîne.
Şîrket her weha plan dike ku hejmara modelên erebeyan kêm bike, portfoya veberhênan û parbûnan hêsantir bike û kapasîteya hilberîna salane bîne asta 9 mîlyon erebeyan. Ev tê wateya kêmbûnek bi qasî 1 mîlyon erebeyan li gorî asta niha.
Pêşeroja çar kargehên li Almanyayê nediyar e
Hê ne diyar e ku ev ji nû ve avakirin dê çawa li kargehên Almanyayê bandor bike. Hat ragihandin ku ji bo tesîsên Emden, Zwickau, Neckarsulm û Hannover, vebijarkên bikaranîna alternatîf jî dê werin nirxandin.
Volkswagen ragihand ku heta Hezîrana 2027'an dê konseptek nû ya avahiyeke hilberînê ya berdewam û pêşbaz were amadekirin.
CEO Oliver Blume pejirandina vê plansê wek «sînyaleke gelek bihêz ji bo pêşeroja şîrketê» nirxand.
Lê Desteya Karmendan a VW'ê û IG Metall destnîşan kirin ku giraniya ji nû ve avakirinê nabe ku bi awayekî yekalî bikeve ser milê karmendan. Nûnerên karmendan bal kişandin ser vê yekê ku di vê qonaxê de ti biryara diyarkirî ya girtina kargehekê tune ye.
Çavkanî: DW Tirkî / Reuters / dpa