Pêvajoya «Tirkiyeya Bêterorî» gihîşt zanîngehan: YÖK ji akademîsyenan piştgirî xwest

Rastinews — YÖK (Desteya Perwerdeya Bilind) ji bo pêvajoya «Tirkiyeya Bêterorî» zanîngeh xistin nav kar.

Li gorî nûçeya rojnameya Evrensel, nameyek bi îmzeya Serokê YÖK Erol Özvar hat şandin hemû zanîngehan. Di nameyê de hat xwestin ku zanîngeh bi xebatên akademîk beşdarî pêvajoyê bibin.

Ji zanîngehan hat xwestin ku alîyên siyasî, huqûqî, aborî, civakî, çandî û ewlehiyê yên pêvajoyê lêkolîn bikin. Ji wan hat xwestin panel, konferans û xebatgehan li dar bixin. Herwiha hat xwestin ku encamên xebatan bi raya giştî re bên parvekirin.

Özvar got zanîngeh divê ne tenê piştgirîya pêvajoyê bikin. Wî got zanîngeh divê bi zanîn, zanist û lêkolînê beşdarî avakirina aramîya civakî ya berdewam bibin.

Bi nameya YÖK re, pêvajoya ku Enqere dimeşîne, bi awayekî fermî gihîşt rojeva akademîk a zanîngehan jî.

Çavkanî: Evrensel